هنا

[Eng.Noor]

هيعونه اليطوف بحضرتك مظلوم
وهيعونه اليشكي همومه بالحضرة
يا سيف النبي ويا فرحت المسكين
ويا باب الصبر للي خلص صبره
تمنيت بضريحك روحي من تروح
يا زوج البتول الطاهر الحرة
حتى الانبياء تندب علي الكرارأسمك يا علي بالموزمه شكبرة
تاريخك مجد يا سيد التاريخ
يا علم الفلك والكون والذرة
منو مثلك علي ضحه شكثر للدين
واخر تضحياته يضحي في عمره
ومن سموه أسد في معركة صفين
وبصولة بدر خله الزلم حدره
ومنهو الي قهر امة بني اسرائيل
وظلت إلى الان بأسمه منقهرة
علي أسمك گـبل ما واحد مسميه
جبرائيل خط أسمك على الصخرة
بالكعبة يحيدر طلگـت أمك بيك
وحته الجن الازرگ لبد في جحره
يونس ندب بيك أنته گـبل متصير
وگـال أحضر علي وخلصني هالمره
يندب يا علي المضايق ومظلوم
واليندب علي شـگـد ينفتح صدره
عفيه شگـد عظيم أنته يبو الابطال
الجن والانس منك كلها متوشره
منو غيرك شفيع النه يبو الكلفات
لو قامت الساعة بنارها الكبرى
يا ركن الرسالة ويا بو ثأر الله
ويا أول القدرة وآخر القدرة
ويا سيف الفقار وقاريء علم الغيب
ويا بيرغ محمد ساعة الوزره
يا صنديد يالمثلك فلا موجود
وكعبة الطلگـتك مو حگـها مفتخرة
عاشرنه طريقك بأول المشوار
وبس أبن الزنا إلي ينكر العشرة
والله يا علي من ننخاك وقت الضيچ
همومي تروح كلها وتنجلي الحسرة
محمد بالغدير شگـال للاسلام
مو وصه بعلي من بعدي بالأمره
ويتبره محمد منه يوم الدين
كلمن ما حزن .. في ليلة الطبرة
علي وأبنه الحسين .. العجب الثورات
بيرغ رفع راسه بآخر الثورة
حسين الما خذل دينه وكتاب الله
شلون يذل حسين وأمه الزهرة
ناده الموت أولى من ركوب العار
وخله جيوشهم على الارض مطشرة
وأبنك أبو فاضل بالغضب بركان
ليث وبالشدايد محد يگـدره
سحكها بالفرات وخله دمها يسيل
تمنيت الفرات تنشف .. ولا قطرة
لأن عطش چـبود المصطفى الاحرار
وعباس نغدر باليمنة واليسرة
مهموم أشتكيلك حالي يا مولاي
مهموم أشتكيلك حالي يا مولاي
أنه بصدري يحيدر غافية العبرة
توازت يا علي والباطل السياف
والحق صار أخرس وأنكسر ظهره
ما يخدر جرح ولا يريد يطيب
سم فرعون بيه الجرح شيخدره
الضلع طـگ وأنكسر وأختلت الأوزان
ومنو غيرك غضنفر يـگـدر يجبره
يا حامي الحمه شنسوي محتارين
تعبنه من الدماء والظلم والهجرة
ما صارت گـبل حتى بزمن نمرود
السواها يزيد وزمرته وشمره
أنه منين أشتكيلك
أنه منين أشتكيلك وأحجي من يا باب
من هذا زماني القاسي وغدره
حقدو عالنسل چـي من علي الكرار
چـم هاشمي آية الضيعو ذكره
خلصنه أنتهينه گـلي وين نروح
وعيشتنه صفت يا عيشة الـگـشرة
يا حاكم يجينه يكض علينه السوط
كصو بسيوفهم وچـفوفهم قذرة
إعتقالات ومشانق سجل التاريخ
وماكو من ظلمهم كل بشر يبره
شكد أسنين عشنه بعالم الأحزان
كل يوم اليجينه نتأمل البشره
من هالك لمالك ننشره وننباع
أوطنه يا علي صار بورق سعره
الحدمن سيدي أستعمار بأستعمار
ويا حاكم يجينه محمل بـ شره
أطينه تضحيات من الشباب هواي
مو مليون حتى أتعدو العشرة
شجاه هذا الوطن بيه كثرة الرايات
كلمن رايته ودستوره وقصره
وشجاه هذا الوطن يا وطن البترول
الحرامية تحوفه ومحد ينطره
الحرامية تحوفه ومحد ينطره

للشاعر سامي السيد

[prïnċë häïdër]

رائعه جدآ هذه القصيده
شكرآ اختي العزيزه ع الانتقاء المميز
دمتِ بخير

[نسيم العراق]

قصيدة جميلة جدا شكرا لك نور ..اللهم يكفيك شر بني آدم بحق محمد وآل محمد.

[mazinalhoseny]

قليل كل ماقلت بحق هذه الكلمات .. تقييم متواضع

[Eng.Noor]

آجركم الله اخوتي الاعزاء