دخاني وصفنتي وحسرتي و وني
أمس بالليل مدري لوين ودني..
وهمومي لبروحي ودمعتي التنشاف
عليه تلملمن من عندي شلعني..
عليه تلملمن بس مومثل كل يوم
حچيتلهن شكو حچايات ياذني..
شكو بروحي سوالف مالهن عنوان
شكو ذكره عله واهس دمعتي تغني..
خنگني وحچيت وماحچن وياي
وگلتلهن شجاچن مااتركني..
انه بعشريني توني وماهويت الشيب
ليش الشيب تارس كل كتر مني..
ليش عيوني ذبلانه وجفاهه النوم
وانه بأول محطه من العمر توني..
ليش الليل ياخذني عله طوله متاع
ويطرني الفجر وبدمعتي يلمني..
لاشفت الفرح لادست دربه بيوم
لا ضاحك بگلبي ولا ضحك سني..
هواي جروح بيه وماگلت مجروح
واعاند بالملح لو راد يلچمني..
طعنات البظهري هواي بس مااگول
اگول بخير وانه الوجع كاتلني..
هواي الفارگوني.. عزاز يابو عزاز
وينه و وينه ذاك البي عطر مني..
(ومو عاشور وشل دمعتي من العين
عله گبر العشگته عيوني وشلني)..
گبل لاغني يم بابه العشگ چتال
عله گبره بدمع غنيتله اعذرني..
اعذرني...
المشاركة الأصلية كتبت بواسطة نبع الحياة @
