احدي ..
يبعد الروح أحدي
ليل الحزن طول ويانه أهواي
أحدي..
أجثير مرتنه مصايب
يامصيبه المنهه نبدي؟
...........
طش الرمل من جفك المتعوب
أقره ابوجهك المترب جثير أذنوب
أشوف أبعينك الحلمانه عشر أدروب
من يادرب تمشي؟؟
= هذا الوطن ينعشك
مثل النبع.. بالعطش محبوب
مثل العشك.. بالزغر مرغوب
مثل النجم.. مثل الخبز
مثل الفرات أهواي مهيوب
: أحبك وأهجرك وأكعد أتانيك هاي الروح
من عشكك فلا أتوب
.........
ومشينه والرمل يتلمس السيكان
ومشينه .. أوفرت النجمات بعيون الرمل داير
حدينه وزلكت الجمات فوك الرمل
تتسنط حدينه
وحدينه أبوحشة التاريخ
درنه أظهورنه لباب المدينه
ياناس..
يلي تريدون الصدك
ياهو اليريد الصدك
يتبع حدينه
أنغلك باب المدينه
ونفتح باب الجزيره
وجوهنه أتلم الرمل ظهريه
والوحشه مزار
أوجوهنه أمن أول حزن لليوم
مغسوله أبنهار
ونته عراف الجزيره
أمن الرمل تعرف مدنهه
وليلهه ونور النهار
ونته من ريحة رملهه
أتفرزن أدروب الرحيل
أنته الأدهم ينعرف من الصهيل
أنته يلطولك مناره
أتصير للضايع دليل
أفترن أبروحي نياشين الجزيره
وفاركيتك
والتكينه
وفضنه نبعين ونخيل
فضنه شوكين وسوالف
ذوبل العاكول منهه
وطك ورد
يندار ويه الشمس... يحتار ويه الفي
يارمل هز النبع كوه.. دخيل المي
.....
وبعد أسولفلك حبيبي
عن قوافلنه الجثيره
وعن حوافر خيلنه الحلوه الزغيره
وعن مواكدنه التجيب السالفه أبليل الجزيره
وعنك.. وعن الهجر
بينك وبيني حبيبي
شرطه تسمع كل حجينه
وبينك وبيني
عبيد الشيخ
والسمسار.. والعطار
والباعت شرفهه أبليل
ياليل المذله المايشبهك ليل
طولت الوكت بينه يأظلم ليل
وبينك وبيني حبيبي
محكمه.. وشاهد رضع من النذاله أسنين
بيني وبينك أبيوت الحكومه
البيهه دم وونين
كلي أشلون أسولفلك حبيبي
أمنين؟؟
كلي اشجم بخت ينراد بالهيمه المتربه
الموت بيهه أيشان للشمس المغربه
يصعد الدخان من بيت الشعر لغروب
ويناغي رملهه
ونته مبعد ..
لانبع .. لاطيف .. لاوصلة حبيب
لاعتابه.. لاربابه.. أتطفي ظيم الكلب وأهموم الغريب
أنته مبعد والهوه أيفر ابدواليبه السنين
تذكر ابيوت الشعر
والحدي اليوجع والدلال
تشتهي الكهوه ويطك بيك الحنين
تشتهي الدمعه الشريفه ويصعد أبدمك حنين
ياغريب.. أهلك الشالوا امن ايام الكحط لليوم
ظلوا مبعدين
ونته بدروب العذاب
وين ماتمشي يلاكيك العذاب
أمنين ماتلتفت تلكالك أذيا ب
ما خلص عمرك أمن اوجوه الذياب
رد مع اقتباس
المشاركة الأصلية كتبت بواسطة تراتيل هادئة
