تابع أول نجمة تطلع
تلگه بيها حسين ..... يرسملك حياة
وفتح الباب الصفنتك
لاتخاف ايزيد مات
مدها عينك
خلها تمشي ويالسباية
تعثر بطفلة قديمة
بيها ريحة سوط
او ريحة نزيف
وبإذنها صياح جفين الطغاة
افتح الباب الصفنتك
شوف ناسك
غيمة تدربه اعلى ليل
والشمس ... وجه الابات
واليتيم يطول ايده اعلى المحال
والقلم يحلب اماني من الخيال
والفرات ايطيح
وتگومه الجبال
الجرح... وكت الصبح ينزف ظلام
يذكر احلام الامس تحت الهلال
اليصلي ويعشكـ الله بلا حوافز
هذا معناه الدلال
وانه....فلاح وجعت
وحطو الحاكم عليه بلا ضمير
والمناجل ...
من حلگـها اتگـطعه وتذبلي الشعير
اليجدي الصفنة فاهم بالوجود
واليعيش بخيمة تحميه الحدود
ورجع ...ألذيج السباية
سوَن اخيام السبيهن
موجوادر...
والسگف جلمة خطاية
الدنيه ....كلشي
بيها جائز أو يجوز
واللزم بجفوفه منصب
بي بخت .. بي نفس ذيج السوالف
لازم يقدس العجوز
العجوز.....الحنطت جفها الجوامع
جيت يمها...
وسألتها بشنهو حلمج ؟
گالت : أرجع ولصباي
وانه فاضت عالعيون اسدود همي
حتى ترجع يم صباها
ورغم ماهي عجوز
بجفها كتبت ...فوگ اديها
اطيني عمي .. اطيني عمي
اسحكـ برمشك دمعتك
خيط اعيونك ولكن...
افتح الباب الصفنتك
تلگه قربان الوسادة
اهواي نذبح من نعام
والينام اعليها ينصح
عدنه يتسمه امام
والفقير .....
الجفه ينفت ..وده ياكل
مو شبع من السلام
انه حلمي هوايه مزعج
والسمع بطل ينام
صفن اعلى السوگ عينك
شوفه صاعد ...شوفه نازل
ذيج.....ذيج أم تبيع بتها
وحطت الدمعة غشة
باعت العيشة وي بتها
وبتها ماكفت عشة
طائفية ... طائفية اعيوني عدهن
للثكالى تنوح عين
وعين ناحت للحسين
قمة السكتة ... السبات
الهدوء صياح باجر
حلگة جف
وصوته قيد .. اعلى الجنات
والمسية اعمامة سودة
بيها الله ايحط نجمته
والحسيني اللابس اسود
لازم يحطم عصاته اعلى العُصات
تابع اول نجمة تطلع
تلگه بيها حسين
يرسملك حياة
رد مع اقتباس
المشاركة الأصلية كتبت بواسطة شذى الربيع
