نوم الحبايب غنج ...
نوم الغريب اوكوف!
وشكد جبير الفرق ...,
بين السمج بالنهر ,
بين السمج مسكوف !؟
وشكد جبير الفرق ...,
بين اليشم الهوى ...
بين الينام بسجن ,,
فوكه حديد وصخر ...
فوك الحديد سكوف !؟
وشكد جبير الفرق ...,
بين اليموت بدرب ...
بين لوصل للوطن ,
والشاف ذاك الضوه ...
والنام بين زلوف !
واحنه الخذانه البحر ...
لا نورس ولا غوه ,
لا نور نجمة يشع ...
وشراع ما مش يرف ,
لا طير فوك جروف !!
وشكد خطيه المحب ...
لمن يخونه الزمن ,
ويخيره وكت الكتل ...
ما بين موتة صلب ,
ما بين موتة حرك ,,
مابين موتة ذبح ,
ما بين كومة سيوف !!
والشوك وسط الكلب ...
نيران من يشتعل ,
والدنيا ساحة حرب ...
والكون صار طفوف !!
الناس تضحك جذب ...
لو صار عدها عرس ,
والمات اهله تدك ...
فوك الجنازة دفوف !
ببلادي اعمى الكمر ...
ببلادي عميه الشمس ,
وعيون ذاك النسر ...
رمده وبعد ما تشوف !
لو يوم عفنه النخل ...
مو رغبة صدك غصب ,,
واكبر دليل الكبد ...
ها كثر مملي زروف !!
لكن وحك الخبز ...
وتراب ديرة هلي ,
والراس ذاك الوفي المرفوع فوك الرمح ,
والطاح بيده العلم والمات دون جفوف !
ما ردنه موتت غرب ...,
ردنه بهذاك العكد ما بين سدره ونبع,
ما بين ياس وشجر ما بين مشتل ورد ,
ما بين همس طيوف !!
ردنه بتكايا الامس مابين دف وضرب ...
ما بين ماي وشمع ...,
ما بين اجمل اسم ما بين احلى حروف!
ردنه بضريحك علي ...,
كون الجنايز تمر ,,
كون اليموت يطوف !!
رد مع اقتباس
حلووو
المشاركة الأصلية كتبت بواسطة .Diyaa Nawar
