فززت الجروح وجيت
وتعنيت اطوف بحضرة الملگه
يشباچ الجفه دخيلك تطفي عيونه الفرگه
يواهس عمري مدي الشوف شيگضيلي الدرب وحدي
اتنطر جفن نعسان غيم طيوفج يندي
يوجه الغبشه لاتبجين الكحله مكاسره جفونج
طشريني اعلى گد الاه اغفه بساحل عيونج
الشبه بين العرس والموت حسبة لون
وانه وياج نتكاسر عشگ عفه
نتبسمل حچي العشاگ
خل نعيش حنه لخاطر الزفه
اتناغه بضماي سنين يل بيج المحنه عيون
وافزع كل هله بروحي واگوم بجفني لطيوفج
واشد روحي اعلى خوف البيج ورتل سورة اهل الشوگ
واشهگ بالهوه الخدران من يعثر على زلوفج
سولفت شكثر لليل بلكي يعرف عنج لون
ولانجمه التمر بالروح عدهه اخبار عل گمره
شمايوگع غصن يغفه بمضيف الناار
ديه برگبت الحطاب يذبح فاس للشجره
يحنة ليل المعرسين عدنه چفوف مامرهه الحمار سنين
ليلچ مر علي خطار عزبته بقصيده وكاس
وسولفت شكثر للناس
مايفهم حجي الخرسان بس السولف بچف
خميت السمه بعينين ماصح بطريج الشوف نجمه تلوگ يم ليلج
ولا طحت اعلى قبلة شوگ حتى بروحي اصليلج
الگمر شمحصل من الليل ينثر كل ضوه بروحه
الهوه شمحصل من الناي حتى ايونس الراعي
تعرف شمية المكتول من سوالف الناعي
اعشگ كل نوايا الگاع لو طاح المطر بعيونهه تعزبه
واكره مشية البسمار ماترحم صدر خشبه
يتسگام الحچي المريود اشوفن بيج بس لوني
ولهسه ومن گفاچ رسوم بعدهي تغازل
رد مع اقتباس
المشاركة الأصلية كتبت بواسطة وعد الأمير
