قصيدة حنين وملامه ، جديد الشاعر عريان السيد خلف 2016
قصيدة حنين وملامه ، جديد الشاعر عريان السيد خلف 2016
جديد قصيدة حنين وملامه للشاعر عريان السيد خلف ، عريان السيد خلف 2016
شلون تگدر ..؟
تاخذ ايدي اعله الگطه البري ,,
الشلع گلبي ..
وعمر ماروضيته ,,
اشلون تگدر ..؟
تاخذ اشفافي ..
على لوز الله الهتك صبري ..
وشعلني وماطفيته ..
اشلون تگدر ..؟
تمسح من عيوني .. فّي رمشك ,, المتعافي ,,الغنج ,,
وتكف أذيته ..
اشلون تاخذني ..؟
عله گد عگلي ,, غريب ,,
وحن محنة طفل ,, ضيع باب بيته ,,
اشلون توعدني ..؟
مثل ذيج المواعيد ..
وعرگ جيدك ..
يفيض ابطيب عمري المانسيته ,,
اشلون ما وديلك ..؟
ولو دمعه بظرف ..
حتى اتعرف ليلي اشكثر .. لجلك بچيته ..
وليش ما صدكت ..؟
من گتلي البعد .. ياذي الگلب ..
ريت الفراگ انهجم بيته ,,
وليش ما خذتك ..؟
ولو صورة ,, ابدلالك ,, لو بزعلك ,,
اخ يا زعلك الدافي ,,
ابغربتي اشگد اشتهيته ,,
ليش ما خليتلك بيه جرح ..؟
من تشتعل . من ذيج الجروح ,,
واگل للناس ,, هاكم شوفوا اذيته ,,
ليش ما وديتلي ..؟
من اسمك سهر ..
يضويلي ليلي الساهريته ..
ليش افز من نومتي ,, ابطولي ..؟
ابگلب مرعوب ,,
من طيفك يدگ نومي ,, وأدور مالگيته ..
ليش ..؟
من مايك ترف ما رويت روحي ,, وريعت ,,
احسن من الكاس الچفيته ,,
ليش لو مريت باسمك افز ..؟
واتذكر دموعك تهل ,,
چن زعلان ,,
والزَّعل حبيبه ,, يموت ريته ,,
ليش ,, ما خليتلك ,, ورده باصابيعك ,,
گلب وياك مصابحه ومبيته ,,
ليش ما زورت جدمك ماي دجلة ..؟
اگبال خضر الياس بالضفه البعيده ,,
ليش ما وسمت ,, چفك بحنة الكاظم ..؟
وبست الباب والشباچ..
وانخه ابحرگه ,, اريده ,,
شلون ما ضويتلك ,, بالشيخ شمعه ,,
وعلگت روح التحبك ,,
فوگ ,, بالنجمه الجديده ,,
اشلون ما لجلك ,, سهرت الليل ,,
حتى اتمايزك ,,
واكتب قصيدة ,,
رد مع اقتباس
المشاركة الأصلية كتبت بواسطة وعد الأمير
