شمس حلمج
فضح لوني
وعمى عيوني
وسمارج فيّ
دلالج يشبه أيامي الجزن
غفلة بتجاعيدي
ومواعيدي
الما جاسن زلوف الحيّ
وتطيح الدنيا بچفوفچ
مثل ماطيح بهدومچ وأرد صبيّ
النجوم سنيني المغربين
والتوهم يشبهونج
وبنآدم گمر
وأنهار هاي الگاع
دمع الله الغسل كل ميت وكل حي
وتدرين الگمر لو طاح
وجهي ع النار ينشاف بس طاريّ
طاري من السماء بلا ضي
سفر والبحر من يخلص كلمن يلبس شراعه
وبَلمنا المنتچي ع الماي
باجر ينتچي ع الطين
بس ماندري يا ساعة
حمل والمايعيّن الناس
باجر ينچوي ذراعه
شعر والمايداوي الآه
باجر تنسي أوجاعه
غصن محني بصلاة الماي
ساجد والحزن جاري
اسبح بالشعب وأبچي
وأستغفر من أفكاري
ابيض الروح بالدنيا
ومن أختنگ بالسرداب
ضميري اليفتح أزراري
وأگل لله گلت للناس
بس مافهموا أشعاري
باجر كلنا جوة الگاع
وفوگ من العمر طاري
يا واحة ،
يا واحة جزيرة تعطش اليختاض من عينج
يا واحة حزن حنة وتوالم وي حياطينج
يا مهرة صهيلج يعبر التاريخ
الشعر گلگامش وسفرة مطر تمشي بشرايينج
بعد چم موت مايبقى ولا ساتر
وبعد چم يوم مايبقى ولا شاعر
بس الصاغ جرح الناس
مثل گلادة بالركبة
يبنيه العمر خامة
المنايا بكيفها تفصله
يحديثة العمر غيمة
اليوشل سنينه للحنطة
يطيح بكيف رزق الله
سجن واصفادي ملح العوز
وعيونج روازيني
وگضة عمره الگصب على المامش يناحر
وهوانا يشرع البيبان
بس القفل بالخاطر
العشگ والناس والدنيا حلم عابر
يبنية العلك من ينعگد مفتاح للباجر
وبنآدم گمر
وأنهار هاي الگاع
دمع الله الغسل كل ميت وكل حي
وفوگ من العمر طاري
طاري من السمه بلا ضيّ
رد مع اقتباس