گتله احبك گال أدري
گتله وانته؟ گال مدري
گتله كون انته بمچاني
ومرة عانيت بكثر ماچنت اعاني
چاگلت اوه امداني
گتله احبك گال أدري
گتله وانته؟ گال مدري
گتله كون انته بمچاني
ومرة عانيت بكثر ماچنت اعاني
چاگلت اوه امداني
يالكلچ براءة وكلشي يوصف بيچ
وتشوفچ اعيون الناس المْغمضة
الشارع بي صداع ايصير من تمشين
طوله ايگوم يفتر يردم ابعُرضه
أيس لاتضن ابعيني گطرة ماي
أبچيها عليك وتغرگ اخدودي
عنودي وما أحن لو تنزف العينين
وبضنك لاتضن ايحن العنودي
مركز للحسن وجناتك الحلوات
وشفافك للنحل صارن خلية
تتأثر الوجنة بخطوتك عالگاع
وتهتز كالجلي گد مـا طرية
عندك نور يشبه نور الهلال
يعني انته گمر وهلال تنقاس
إصعد فوگ بيتك باچر وشوف
إذا مو عگب باچر تفطر الناس
اعيوني ابغير رسمك كرهن الشوف
اوعندي اخلاف عينك مالهن داعي
ولأن بذراعي اشمن ريحتك دوم
تجي ساعات افكر آكل اذراعي
على نار انتظر ومتاني الاحباب
واندگ باب بيتي والگلب ذاب
اطلعت للباب عود الباب افتحه
لگيت الباب طالع فاتح الباب
شگد شايف شفايف فوگهن شامات
مثل شفتك أبد ما ملتقي بشفة
تكض اللفة تاكل من تحس بجوع
من كثر الحلاوة تعضك اللفة
يا أول عشگ ياخذني لبعيد
يا أول محب يحتل كياني
زعلت اوياك مرة وخلصت اوياك
وآني اوياك صار وطلگاني
كل حلو ينباس بس انته الوحيد
دخنه بيك وعدنه صارت هوسة
خدك ايكهرب واليبوسه يطيح
گمنه من ابعيد ناخذ بوسة
