شنو عود ميو؟
إي المياو لها معنى، ويمكن فاضي اللي حاول يفسر معناها ويدرس حركات البزازين وحركة الذيل والإذن والجسم مع كل صوت، ويمكن اللي قاعد يكتب هالموضوع أخس منه، بس المهم سؤال وقررت أشوف جوابه!
المياو صوت مميز وحسب كلام علماء ومحللين البزونه يكون صوت للتواصل وغالباً الغرض منه الطلب من البشر، يبي ياكل، يبي يطلع، يبيك تشوفه، يبي عصير ليمون، يبي يعرف شالسالفة، وين رايح وين ياي
.. الخ، أذكر مرة رحت مطعم أيام زمان اللي يم حديقة الشعب وقعدت بره، أول ما يابولنا المشاوي ولا القطاوة يتجمعون حوالينا وطايحين له دلع كل وحده مياو مياو يبون ياكلون معانه مع ويوههم
، طبعاً ما عطيتهم شي قمت ألاحقهم واحذف عليهم تلفوني عشان يوخرون
، من يومتها واحس كل قطاوة الديرة حاقده علي، كلما امر من قطو يخز فيني خز تقول ماكل عشاهم، مثل يقول داخله: “مو جنه هذا اللي قالوا عنه ذاك اليوم حذفنا بالتلفون؟”
لاحظ يعني المياو ما يقولونها القطاوة بينهم بين بعض، بس حق البشر! وغالباً يكون من القطاوة المنزلية الأليفة مو عتاوية الشوارع. ويمكن احنا بالعربي نكتبها مياو بس عالمياً اختلفت تسمية الصوت أو كتبتها: بالياباني يقولون “نيا” – nyaa حتى نلاحظ هالشي بكارتوناتهم، بالأندونيسي يقولون ngeong! شكو مادري! بالفيتنامي ميو-ميو – meo-meo، بالألماني ما باعدوا عنا كتبوها Miau. كتابة صوت وتقليده بكلمة يسمونها بالانجليزي أنوموتوبويا – Onomatopoeia وهو الإيحاء اللفظي للصوت.
ميو
رد مع اقتباس
المشاركة الأصلية كتبت بواسطة رهف
