السلام عليكم
طبعا الجمع للقصائد والابوذيه والدارميات ليس من قبلي
عبد الحسين الحلفي مدرسة شعرية ...
عبد الحسين الحلفي ابكانا واضحكنا في يومها ,ابكتنا في:
ايام غربة قهــــر نــــيران ويشلـوطن
ودكات كلبي عرك احــــاه علن ها وطن
شيطان وسوس الي وبراسي دندن وطن
خلاني عفت الاهل بيت وتركته وارض
كتلة دريض ولك بس ما تـــــهدة ورض
بالغربة حطوا الي بكل كتر كسر ورض
ومن كطعوني وصل كل وصلة صاحت وطن
واثار اعجابنا في ابوذيات لم تطرق مسامعنا بمواضيعها المبتكرة ,تضاد ومفارقة عجيبتين:
ها تــــــعبني حبك ها اذاني
دخت ها يا صلاتي ها يذاني
اكول التوبة ما احب هاي اذاني
اهد ذاني ويرد حبك علية
وغيرها الكثير الكثير,حتى انه ادخل ثقافته الفلسفية في الابوذية:
بنا قصورة بس لاتظن بنا دام
جرحنا لجن ما بين بنا دام
ابن حوا مو شرط يطلع بن ادم
لان حوا اطلعت موش ادمية
ثم يشرح ما يجري في العراق ,بقصيدة قصيرة:
بعهد صدام جام البيت مكســور
ومن البرد ليلـــــــــــك ما تنامه
هسه البيت زين وصار بيه جام
بس كلب العراقي انكــسر جامه
الكراسي كاعده فوك الـــكراسي
لان ماكو زعيم ولا زعامــــــــه
ذله بذلة نكضي الليل ما ننــــــام
والبصبح بالمدرسه ندرس كرامه
ووالدنه الوطن بابا نــــــــــسميه
شو بابا عدل وحنة يـــــــــــتامه
عجيب شكد ايمة يا وطن بيــــك
ووجهك للرحم ما بيه علامـــــه
عجيب وبيك ابو فاضل العباس
عند جف ولا عندك شهامــــــه
ممنوع التجول يا وطن بيـــــك
لان حتى الدرب ساحب اقسامه
وشمل منع التجول حتى العظام
والدم ماكدر يمشي بعظامــــــه
حمام الناس ونته يا وطن حوم
منك ما اظن تسلم حمامــــــــة
انت بروفيسور بقبض الارواح
وعزرائيل الك دنك الهامـــــــه
يوميه قيامه يا وطن بيـــــــــك
اذن كلش سهل يوم القيامـــــه
.
كأنني اراه الان يخاطب حبيبته بطريقه جديدة-والابوذية كالعادة مخاطب للمذكر-:
صراير عشك روحي وكصرتلك
ونفس وكت المنازع وك صرت لك
طويل واعلى منك واكصرتلك
حتى تلوح من تبوس ادية
فهذا هو العاشق الجبار,اما العاشق الذليل-ولا ذلة في الحب-:
عدل صوبك جدامي جر عدل لك
وادليك بحجي المر جرعدلك
اثكل كافي بسك جر عدل لك
زعلت؟لاتجر عدل حقك علية
هذا هو الحلفي!!!!
ـــــــــــــــــــــــــ ــــــــــــــــــــ
تسوه الدنيه
للشاعر المبدع دوماً
عبد الحسين الحلفي
انشع من اشوفنك علي جاي :: واسكر حيل اذا اشبكك اطوطح
ويصير العيد ماتم لون ما جيت :: وبيوم الطبك لو جيت افرح
واكول اربحت واني وياك خسران :: واكول اخسرت لو وي غيرك اربح
مرجوحه الكلب ومحبتك عيد :: وبما انك طفل حقك تمرجح
حلو .. وتلمع .. وتكتل انت اذا سيف :: اذا عذرك وياك وانت تجرح
وما افكر خاف انت تذبحني :: افكر خاف اتعبك وانت تذبح
اعرفنك غلط بس مستعز بيك :: وكمت لخاطرك حته اكره الصح
تسوة الدنيا عندي من اكعد وياك :: وبدونك كلشي ما تسوه دنيتي
من اطب لبيتكم اشبك على الباب :: ويشبكك بابنه من تطب بيتي
فرق مابين عمري وعمرك هواي :: وكمت لخاطرك اصبغ لحيتي
اتأذه اذا وي غيرك ارتاح :: وحيل ارتاح اذا منك اذيتي
عليك العين تبجي ليل ونهار :: واكلهه اشعطلج شو ما بجيتي
يوصي اهله بجهاله الرايد ايموت :: وبس اسمك لكو اهلي بوصيتي
اعله غيرك ما نحت ما بيه ع النوح :: وعليك شكد حلو يونسني نوحي
كظيت زيارتي بس اندعيلك :: ونسيت وداعتك اندعي لروحي
جنت من روحي ضايج كبل ملكاك :: وكل ساعه اكل لروحي دروحي
هسه لا بعد من روحي ما اضوج :: اضوج اشلون وانت الصرت روحي
سجين بحبك اني متاني الافراج :: واصلي واندعي لا يجي افراجي
محتاج لحنانك حيل محتاج :: ومحد غيرك يسدلي احتياجي
تحرجني بقصد وتطلع الروح :: واكل للروح ما يقصد احراجي
ابو الطبع المزاجي اشكد اكرهة :: واموت عليك جي طبعك مزاجي
ـــــــــــــــــــــــــ ـــــــــــــــــــــــــ ـــــــــــــــــــــــــ ــــــــــــــــــــ
طك كلبي عليك
طك كلبي عليك وجيت اشوفك .....على بختك تكلي شعندك وجاي
والله حتة هل كلمة حلوة منك.......... واتمنى علية تعيدهة هواي
لذالك حتة انة اسمعهة اكثر....... راح ابقة علة بابك رايح وجاي
اشما تصعب علي صدكني ارتاح.... اريدنك صعب لاتسهل وياي
يجوز بهاي ايدي الزم سباع........... بس تخوني من الزم الماي
على بختك شنو السويته وياك.. عفت ناسي وخذيتك عوض ناسي
احبك ما احس اكرهك فد يوم..... واذا حسيت هم اكره احساسي
يذكروني بعذابي الشفتة وياك............ واذكر واكلهم والله ناسي
كلش قاسي وبالذات وياي......... واكول وياي بس انتة مو قاسي
وكفت انتة علة راسي بجدم سكران... وتريد اطيح ويعدلك راسي
بحبك تختلف حتة القياسات........ صفر حبك كسر رقمة القياسي
ومدري شبية اشمك وانتة عاكول..... وغيرك ما اشمة وهوة قداح
واحس نغزاتك رماح وية الانفاس. واكول افيش وانة اتنفس ارماح
اذا ماتسمع صياحي الخلل بيك. اليصيح احسن من المايسمع صياح
واذا انة طحت صدكني ماضوج.... الوكفتة طولت بالطيحة يرتاح
بس خلي ابالك ياضوة العين... الاصيل تروح روحة لو محب راح
المرجوحة الاصيلة تكطع حبال.... اذا بالعيد من عدهة طفل طاح
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــ
قصائد + ابوذيات + ومضات
للاستاذ والكبير
الشاعر
عبد الحسـين الحلفي
إبحلاتك سيد وينكالك مولاي
ومن كد مادخت كتلك يمولاتي
شفتك غوشت عيني وكمت ماشوف
درت وجهي صفح شافتك اذانانتي ؟
من كد ما حلو محد مشة وياك
وألماشاك هم ما ظل يماشيك
إهو ماشاف دربة إتعثر وطاح
لإن كضاها بس يعاين إعليك !!
أحبك حب ولا مر إعلة أنسان
وتدري أشكد أحبك راح أفهمك
إحلمت آنة بالجنة وأنتة بالنار
أكفّر كمت حتة أنتقل يمك ""
مو بس آني أذوب وأخدر إعليك
إمن أحلم بيك حتة فراشي يخدر
منو ألكال ألكمر يفتر على ألكاع
ألكمر شافك وداخ وكام يفتر
قشمروني وجان ظنهم قشمروك
وغلطو أكبر غلط جي ما فكرو
عود باعوني وعلى عنادي أشتروك
وأنتة آنة إذن هم أتقشمرو
على نار أنتظر ومتاني ألأحباب
وإندك باب بيتي وألكلب ذاب
إطلعت للباب عود ألباب أفتحة
لكيت ألباب طالع فاتح ألباب
حلو وتتكلب ويختلف وضعك
وكذلتك طايرة وتلعب على ألريح
ألوحيد أنت حلو ومحد يتبعك
لإن من تمر كلهة تدوخ وتطيح
شحلات أللي تحبه كبل ميروح
بحلات آخر نفس من تكظي ألأنفاس
وحلات ألعيد أول يوم بالعيد
وحلاتك من تجيني أول ألناس
إسهامك عذبني كطعني
وأرافس وإضحكت جي ضحك سنك
إشردت منك أحس مرتاح لني
إطلعت بيك آني شارد موش منك
إبوطنة ألضحكة شردت من ألحلوك
وألعيدية دوم إمزاعلة ألأيد
يجينة إلعيد جان ومامش هدوم
هسة هدوم عدنة ومايجي إلعيد
ألجمال ألبيك دايخ هوة بيك
ويمكن أيدك تخدر إمن تكض أديك
أنتة ربك خالقك بس شكل خاص
يمكن إمسويك إلة يعاين عليك
هوة غيرك من أشمنة أموت
لاكن أرجع عدل من أشتم هواك
تدري آنة أشكد أحبنك بحيث
من تهد أنت علية أفزع وراك
الحكومه انطت شعبها ارقام ورقام
حتة يخابر ويشرح إهمومة
شعب خارج نطاق التغطية يعيش
إذن شيسوي برقام الحكومة
كل حلو ينباس بس إنت الوحيد
دخنه بيك وعدنة صارت هوسة
خدك يكهرب واليبوسه يطيح
كمنه من إبعيد ناخذ بوسة
يل رحت زعلان من عندي ومشيت
إعذرني جي خليتك بزعلك رحت
لأن مالحكت اكلك لاتروح
بس ثكل وجهك عليّ آنه طحت
جم محب حاول كدر ينسه الحبيب
وآنه من أنساك اظل دايخ عليك
إنت حبك يختلف فد شي غريب
حته نسيانك حلو يذكرني بيك
عذاب البرزخ آنه تعذبت بيك
ولكن بالكلب ظل حبك إيزيد
وإذا كالولي عوفه وجنه ننطيك
أريدن برزخك أي جنه ماريد
عليك الكلب ثابت قفل مقفول
وأموت وما أدور عن بديلك
ماحب الصلاه بس كمت أصلي
أصلي لخاطرك حته أندعيلك
كلبت بوراقي بس إسمك لكيت
وماكو غير اسمك إسم بوراقي
كلها كالت راقي عنك من إجيت
وكلها كالت ماكو غيرك راقي
ـــــــــــــــــــــــــ ـــــــــــــــــــــــــ ــــ
أذا احجي وي غيرك قصدي وياك
واذا حبـــــــيت غيرك انت أعنيك
مــــااذكرك بـــــــس جذب أنساك
واذا أنا اذكـــرت يعني أنا ناسيك
عقلي الماعرف هــــــــذا ولاذاك
ولاأنا الـعرفني شــــــعـرفه بـيك
ماأفتهم كل شي بغير طـــــرواك
مسودن وأفتهم كل شي منلاكيك
كتبت راح أكرهك وتوقع أنساك
حدرها وقعت صرت أنا مجنون
رجعت أتأكدت شو طلعت أهواك
ردت أمسحها زادت ترست الكون
أذن أهواك كون يدور بيه
ولابيها مجال أنساك هيهات
واذا انه ارد اكلك كافي جيه
لساني أيكول مو تكطع الجيات
زين لساني شوف جفوف أيديه
على مودك يسرتي لوت يمناي
ينسني من احضنك هاي هيه
اردن هاي كوه اتروحلك هاي
ضجت منك وكلبي أسوه بيه
كطع نبضه وزعل وتعارك وياي
ـــــــــــــــــــــــــ ـــــــــــــــــــــــ
شحلات الي تحبه
شحلات الي تحبه قبل لي يروح*** بحلات اخر نفس من تكضي الانفاس
وحلات العيد اول يوم بالعيد*** وحلاتك من تجيني اول الناس
افك ريجي بصباح الخير يفلان*** وصباح النور منك تاج عالراس
تعال وجيب خدك واكتل الليل *** كبل خدك ضوه خدودك الينباس
تعال شعطلك ما جيتني شبيك*** اريدن بيك افوز وارفع الكاس
تساويني بنظر عينك وي الغير *** اذا عينك عمت باوع بالاحساس
ولك شوف الورد مايملك عيون *** وبلحضة الشم يميز الناس
شكد تخطر ابالي والك اشتاك *** ولالحضه اعله بالك بيها اخطر
تعال واغلط وياي وانته معذور*** ومو انه الاعذرك انته تعذر
حتى صيامي يفرق عن الاسلام*** حسب جيتك يجوز يطول اشهر
تعال ومر علي حتى لو رمضان*** اشوفك عيد كبل العيد وافطر
تعال شبيك ادخلك جنة اشعار*** وافرك احلى فره بين الاسطر
ولك حتى السما من تحن عالكاع*** تضل تبجي ومطر عالكاع تمطر
تعال شعطلك ما جيتني شبيك **** انه وبيتنه وشارعنه ننطر
كل ساعه اطلع اسمع صوت عالباب*** اثاري الباب ظل بروحه يسطر
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ــــــ
أنت أول ألحلوين متصدر ألكل
حتة ألمرورة ألبيك هم حلوة تكتل
_________________
يمكن علي زعلان وأتمنة زعلان
أهون زعل كل يوم من لحظة نسيان
_________________
تضحك علي أدريك بس حالة بية
أضحك وأصير وياك وأضحك علية
_________________
تدري آنة شتمنيت ساعة ألشفتك
كل جسمي شفة يصير وألزك بشفتك
_________________
يل ردت عني تروح روح بسلامة
بس عدنة راح يصير يوم ألقيامة
_________________
عالحشر تنشد ليش ماتدري يمتة
ألحشر عدنة يصير من تزعل أنتة
_________________
ضلمة وخطية ألناس تعثر بالدروب
بس أنت كلشي تشوف شي وجهك كلوب
_________________
لاتظن واحد يوم غيرك عشكتة
ولو يوم أحب أثنين هم أنتة وأنتة
_________________
مفتوحة بس متشوف غيرك عزيزين
ومغمضة وتحس بيك وتشوفك ألعين
_________________
ظلو إعزاز ألروح محد مسحتة
إمسحت بس أعزاز وألباقي أنتة
_________________
وألحسن أحلف دوم ما بعد أجيكم
وأوصل لحرف ألنون وأرجع عليكم
_________________
بلبل وأحس مخنوك مابية تغريد
أنصب عزة إبعاشور وألختمة بالعيد
_________________
نص مني ونة وآه نص مني تغريد
بيد أشبك ألدمعات بيد أشبك ألعيد
_________________
لو فد سباق يصير ياهو أجمل ألناس
ونذب عليك تراب هم تاخذ ألكاس
_________________
إبكل حلو لولة تصير بس شحجي عنك
صارت أللولة ألبيك حتى أحلة منك
_________________
تاني ألعيد لهلالة ينطر
بس آني أصوم إعليك وبجيتك أفطر
_________________
رغم ألبعد ياصاح شخصك حضنتة
أحجي أوية روحي أليوم حسبالي أنتة
_________________
ماعيدت بالعيد بس آنه معذور ..
شتظن يضحكه العيد البكلبه عاشور ..
_________________
ملهوف إجاني ألعيد ها كتله شتريد ..
راويته جرح الناس ظل يلطم العيد ..
_________________
مو ماتجي متانيك وك كلبي ميهيد ..
لو ماتجي إقرايات يتحول العيد ..
_________________
ياعيد أعيد بي مادامك بعيد ..
لو ما تمر بالعيد غير أذبح العيد
_________________
عمي إنت ظل بالبيت وين إنت طالع ..
من تطلع إنت العيد يلزم الشارع ..
_________________
عيب إستحي من الناس يادمعه ردي ..
ليش بصباح العيد دستي إعله خدي ..
_________________
عيد الفطر شيفيد لو يبقه للدوم ..
مادامة كلبي إعليك مابطل الصوم ..
_________________
أصفن وأشخص بيك ونبطح
وصفن ..
ماشايف آنه عيون هاون يقصفن ..
_________________
تدري إبوطنه شلون مرتفعه الأسعار ..
بس البشر عالكاع حاجه بربع صار ..
_________________
صح انت عني بعيد وصح ما اشوفك
بس كلبي بالدكات ينطق حروفك
_________________
إيدوخ هوى الحلوين يصطر ترا هو ..
حاجاني إخوي اليوم كتله انت ياهو ..
_________________
تمشي أوية غيري إشلون ماأقبل بهاي ..
وك آنه أغار إعليك من تمشي وياي ..
_________________
حد أبد مامعقول وصلت محبتك ..
إمن إشفافي أغار إعليك مامره بستك ..
_________________
حقة أليصد أعليك ماسيطر وداخ ..
من كد حلاة البيك شايب صرخ آخ ..
_________________
صح بالكلب خانات تارسهن آنة ..
بس خاف أحصل صاك موجوده خانة ..
_________________
مانكدر انصد ليك نتكهرب نموت ..
تكتل حلاة البيك خنغمض وفوت ..
_________________
كل يوم أمرن بي وكلساع أشبكة ..
وأصرخ يربي شلون تكتل الفركة ..
_________________
من عندي مدري شطاح من كتلي رايح ..
من دورو وياي ثاري آنه طايح ..
_________________
إشكثر عندي عزاز بعيوني ذني ..
ونتة أعزمن كل ذول حتة أعز مني ..
_________________
لو بيدي أحط الروح ضحكه إعله سنك ..
وكون الحزن ينباك جا بكته منك ..
_________________
من حقي أنوح إعليك يحلالي نوحي ..
بيك ألكه عمري الراح بيك ألكه روحي ..
_________________
خيولي كلمن راح وستقبل الجاي ..
رام الكلب مفتوح يتحمل هواي ..
_________________
تضحك: تفك الزيج: تغمز: قديمات ..
شتظن أطخلك راس وكبالي شمات ..
_________________
منك أريد حلوك وأحسبها خوه ..
ما أرتوي منلماي من حلكك أروه ..
_________________
كل الجروح تهون أذاني جرحك ..
ناسي الضحك بجفاك ما أعرف أضحك ..
_________________
راح أخبر السلطات وهلي وعمامي ..
من عندي كلبي إنباك ونته الحرامي ..
_________________
تدري الحلاة البيك وصلت إلى حد ..
جن كمر نص الليل من تلبس أسود ..
_________________
أحلف ابحزن الروح واحلف بلجروح ..
صح قافل النقال بس كلبي مفتوح ..
_________________
وين المحنه البيك شو ما أحسها ..
كلبي إعله مودك ناس واجد لبسها ..
_________________
ريحة حرك بالروح مدري إشبيها ..
يمكن حبيب الروح بدل عليها ..
_________________
تدري شكثر أهواك وأشكد أريدك ..
من إيدي إغار إعليك من ألزم إيدك
_________________
وين الحلاة البيك موزين احبك ..
آنة إمن أحصل صاك شتظن اكلبك ..
_________________
مايطلع من العين دمعي آنه مضموم ..
بس من زعلت اوياي طاح اعله الهدوم
_
صح انت عني بعيد وصح ما اشوفك
بس كلبي بالدكات ينطق حروفك
رد مع اقتباس
