السلام عليكم اصدقائي
ممكن شوية من وقتكم تستمعون او خل نگول تقرون الي كتبته
اصدقائي اخوتي واخواتي الدرر ، طبعاً اني ما احب اكتب بمثل هيج مواضيع ولا احب اتدخل بيهه او اتكلم عنها حتى قليل ادخل بنقاش والي يعرفني يعرف حقيقة هالشي ، بس الي خلاني اكتب الكم هالموضوع هو الوضع الحالي للمنتدى واعضاءه ..
أصدقائي قبل كل شي اقروا وياي :
قال تعالى : " وجادلهم بالتي هي أحسن فأذا الذي بينك وبينه عداوة كأنه ولي حميم "
قال الرسول (ص) : " المسلم من سَلِم الناسَ من يدهِ ولسانه "
قال (ص) أيضاً : " من كان يؤمن بالله واليوم الآخر فليقل خيراً او ليصمت "
تلاحظون شگد أكد سبحانه وتعالى والرسول محمد (ص) على مسألة الكلام والنقاش وشلون أكدوا على وجوب وبصيغة ( الأمر ) ان نتحلى بآداب الحديث والقول الحسن ..
ان نجادل بعضنا بالحسنى وبطريقة وديه ، حتى الي يعادينه نگدر نكسب وده
المسلم الحقيقي هو الي تسلم الناس من ايده ومن ( لسانه ) كلامه يعني
اذا ما عدنه كلام حسن و رد إيجابي ، نسكت احسن
موضوعي هنا هو بسبب طريقة كلام بعض الأعضاء بالنقاش ، اعزائي احنه ما عدنة ساحة حرب هنا ، صح الكل إله حرية التعبير عن الرأي لكن مو على حساب آراء الآخرين ولا من حقنه نجبر غيرنه على رأينه ، وأيضاً تعصب بعض الأعضاء وللأسف أكو عنصرية في نفوس البعض
وطبعاً موضوعي هذا مو للنقاش واتمنى ان تكتفون بالأطلاع عليه ومراجعة دواخلكم ، لأني مثل ما گلتلكم ما احب اناقش وحبيت فقط انطي وجهة نظري بالي دا يصير بس بشكل مغاير وعلى شكل موضوع مستقل
البلد دايمر بظروف صعبة صحيح وهالشي أثر بشكل كبير على نفسية الشعب العراقي
بس هذا مو عذر يخلينه بحالة تشنج وعصبية من الآخرين لمجرد اختلاف رأيهم ومعتقدهم عن رأينه ومعتقدنه ونتراشق التهايم بيناتنه ..
أحنه صدّاگين ونريد الخير لبلدنه ! خل نبدي بروحنه ، خل نصلح من نفسنه خل نعيش حياتنه بطريقة صحيحة ، خل نربي جيل بيه خير ومثقف ومؤمن خل نشوف عوائلنه ونبدي الأصلاح منهه
مو آني ابني ما يصلي وبنتي ما تصوم وأروح على فلان أكوله ليش هيج تصلي ؟ ومايصير وصلاتك مو صحيحة ومايقبلهه الله .. ، أو فلان صام يوم العيد اجي احاسبه واني ما صمت شهر رمضان كله ..
الحجي سهل ، والدليل هواي يحجون ويدعون للأصلاح والتغيير خلف شاشات الكومبيوتر او الموبايل وهو ما يتحمل يطلع يوم واحد بالشمس مظاهرات فعلية يطالب بهالاشياء ..
نگعد نكفر فلان ناس و نحجي ونلوم فلان طائفة ، ليش مانراجع نفسنه ؟ هو منو دمر بلدنه غيرنه ، خل نحجي الواقع ، مو أحنه جبنه هاي الحكومة! مو أحنه الي انتخبناهم ؟ عنكم هالسالفة
مو احنه الساكتين ع الوضع ؟ لا تحجولي ع المظاهرات والاعتصامات ، ماجانت قوية وماجانو مصرين ومتمسكين بمطالبهم ، ماكو لهسه مظاهرات فعلية حقيقة نفذت من خلالهه مطالب الشعب .
احنه ابو المولدة مدا نگدرله من يرفع سعر الأمبير واحنه ساكتين نخاف لا يگطعهه علينه تريدونه نگدر بهذا حالنه واستسلامنه نگدر نغير واقع بلدنه ؟؟!!
هذا مو موضوعي بس حبيت اوضح الكم وابين شلون احنه منگدر نغير شي بواقع حالنه ، فخل نبدي من انفسنه وعوائلنه الي هي مجتمع مصغر وبعدين نتدخل بغيرنه ..
فأتمنى ان كل شخص يعطي رأيه بطريقة ودية وكلام حسن او لا يعلق اذا حس بغضب او ان تعليقه حيكون سلبي بكل المواضيع الي تتطلب نقاش ،وخل نبتعد عن الحس الطائفي والتعصبي والمذهبي ، منتدانا عراقي غير طائفي .. خلونه اخوه بعيدين عن الطائفية هذا المرض الي ديمشي بينه ويفتك بلدنه ويدمره من الداخل اضافة الى الدمار الي دا يجيه من الخارج .. تره حرام والله حرام الي دا نسويه بنفسنه وببلدنه ، تره احنه السبب لحد يگول لا ولحد يگول الدولة الفلانية والفلانية هي السبب ، لأن لو ما احنه مجان گدرو يتدخلون
واكرر رجاءاً رجاءاً ، اذا ماعندك رد مناسب لا ترد على موضوعي لأني ما راح اناقش واذا حسيت انه صار نقاش وجدال بالموضوع حأضطر لحذف الردود واغلاق الموضوع ..
واتمنى تتقبلون كلامي ، وخل نبتعد عن الردود والمواضيع السلبية وخل نرتقي بردودنه وبمنتدانا الي هو واجهة تعكس مدا وعينه وثقافتنه للغير ..
وهواي كتبت هاي اول مرة بحياتي هلگد احجي بس الي ديصير بالمنتدى هالأيام سواء بالمواضيع النقاشية العادية او بالمواضيع الي تحولونهه طائفية هي الي خلتني احجي .. وهاي اول وآخر مرة
تفهمتوني خيراً على خير .. ما تفهمتوني اني بريت وريحت ضميري وحجيت ..
تحياتي الكم
ملاك96
رد مع اقتباس
طولتي هواي
