حضر جادرك هم باجر يفجرون
حــضّر چادرك هــم باچر يفجــرون
ما يــردونــه إنـــكــمل مسيــرتــنه
نتكــاتف چذب گــدام كــل الناس
ومن رديــنه عالتـفــرقه إتكاتفــنه
خل نسأل نــفسنه ولــو مره ابـيوم
گبل شو چنه وين أوين شو صرنه
مقــهورين نتــظاهــر على البحــرين
وعلى قدس العروبه احنه تظاهرنه
وخل شيصير بس لتجيب طاري إيران
عيب إمن الفــقيه وهــاي جـارتنه
وبالك تنــتــقد لو تسب آل إسعود
زحمه إمن الحــكومه وتزعل السنه
شباب إتفجرو ما تارسين العين
ميهمونه بس نيجيريا إتهــمـنه
من بطن الظلم والبطن الإستعمار
أشو تاهت علــينه مــحد يردنه
إبتلينه بسيطرات ولعبة السونار
يداعش فرحي بالكراده عيدنه
اي والدحه خيبر باچر إديحون
اي شدگول گول أخلاق ما عدنه
خليتو الشباب إتصيح متندمين
لو ندريهه هيچي چان هاجرنه
بيت المال عندك والشعب جوعان
التقشف حجه إجاك وحتى تنهبنه
بهدوم الحشد يستعرض المسؤل
بتبــريد المــظلل شاعـل الفـتـنه
شنو يوميه أزفــن للمگابر شـاب
شنو درب النجف ما عنده غير احنه
رايدلي شهيد إبن الوزير يــكون
لأن احنه الصراحه بعد ما عدنه
أريداً لافته ومكتوب بيهه .. اليوم
إستشهد إبن الــ .. بلكت تسكتنه
جاملنه بشهيد وحتى من يحچون
إنگلهم عدنه ريـّس ما بخل بأبنه
هذا إبن الرئيس الما ينام الليل
إمخلصهه عالساتر حتى يحرسنه
مو إبن الرئيس يصـيّف إباريس
أولد الخايبه احنه الصيف حارگنه
ومع لا إحترامي الحزب هذا وذاك
لا مــا مسـتـقل كــلـنه تــحـزبنه
وباچر من ترد الموصل ونرتاح
ما نــرتاح كــلهه إتـصيح حـصتنه
رد مع اقتباس
