صورة شاب يم اوّل محطّة انبا گن سنينه
أم تصلي يم الباب
نثية تسولف ويه الموت
طفلة متانيه الليل وفرا گينه...
بچه بوجوهنا الشبّاچ
نمطر دم
خذتنه النار واحترگت جناسينه
تطشرنا حرف من هذا , اسم من ذاك
ياهو اليقره أسامينه!؟..
وطن مايعرف شبينه..
گاع محزّمة بدمنه
وسمه تشرب سوالفنة وبواچينه...
يروحي العيد مو ذاك التعودنه اعلى ضحكاته
ولاذاك التعرفينه....
هذاك العيد بيه من كلشي صوغة ماي
وتذكرين لمن چان شطه يفيض ويغنّي بسواجينه....
وتذكرين من چانت الطيبة بكل وجه متعوب
من چانت گلوب الناس تتشابه ..گلوب ومن فرد طينة
من چان الصبح يندل ... گبل يندل يجي بوكته
ويطب للبيت ويشرّع روازينه....
من چانت نوايا الناس عالفطرة
الصد گ والشرف عالفطرة...
الضحك والخبز عالفطرة ...
الدمع والموت عالفطرة
من چانت بيوت الطين ترسم للوطن تاريخ
وتغنّي القصيدة المالحة السمرة....
گبل ما چان هيچ الليل
چان بكل صريفة يطشّر الگمرة….
من چان العشگ موصوف للفلّاح
چانت گاعهم و گلوبهم خضرة...
چان العيد
من چانوا اطفال الوطن محروسين بسم الله..
انسحگت قيمة الانسان
هسه اطفالنا الحلوين ينذبحون بسم الله
للمبدع ميثاق الهلالي
رد مع اقتباس
أحسنت
المشاركة الأصلية كتبت بواسطة أحمد العثمانيے
