يافراتي..
نايم او جرحين من حزنك..،
مثل كتر الفرات امتدت اويه اضلوعي ريش
نايم او نومك غنج..نومك الدراويش.
....
اشكَد نكَص ماي الصحو بايامنَه..،اوماي الحلم معباره كَيش
وانتَ طيف الماي..،
والثوب الترف ،والعافية الما منها ليش
يافراتي..،
يتعِب ابلايه نعاس النوم..،
وانتَ اعله الحلم طشّيت نومك..ياحلم نشريك بيش..؟!
...
يافرات النوم خطّارك /عزيز/..،
اشكَد رِكَص واخياله نار،الليلة ضيفك،يطفي روحه ابحضرتَك..،
غطّيه بردانك يمن وجهك خطَف لون الدشاديش
تدري حد الصبح روحه اتبوس طولَك..،
يضوي..اصابيعه لِعب دف الدراويش..
/بالركَص..
يعركَ خَجل دف الدراويش /
....
يافراتي..اشسولَف ابنومك نهرنَه..؟ اشجان نبض الجرف يحجي..؟
اشجانت الموجات تهمس..؟وانتَ بين الماي والنبضه الحنِينَه..،
ابيا كتر طيفك عله المَد يرتجي..؟
والفرات..
الفرات الما صحَه..
ابروحه محتارة السنين..اشكَد دمع فاض اعله حدَّه..هذا مايه امن البجي.
يافراتي..هَم صحيت اوجاست اكتارك شمس..؟
ما دريت اشكَال خيط الفجْر الاحمر ع اللي راح او ع اليجي.
....
_نومَه روح الماي كلّه ابحضني بات الليلة وانباكَ الصبح
_ نومَه بيهه /اسرار ابو الليل/ او لِعب درويش روحه ابنص رُمَح.
...
يافراتي..
اشسولف ابنومك نهرنَه ؟ اشكَال من هام ابحزنَّه..؟
هَم يهيد او ينطفي هذا الجرح؟!
يافراتي..نايم اوجرحين من حزنك..مثل كتر الفرات التمّن ابجفني ملح .
::::::::
يافراتي..
يتعِب ابلايه نعاس النوم، وانتَ اعله الحلم ودّيت روحك..،
بين جرفين الفرات....بين سيفين الذبح......
رد مع اقتباس
المشاركة الأصلية كتبت بواسطة HaSsoOn
