*علي الشباني
شهـﮓ وتلاﮔن الشبـﮕات
جرح... هلهل صهيل الـﮕذلة المعرسة بضوه الـﭽيلات
عَت روحه.. وإجت كل نجمة سهرانة...
عتبها إمغامز وحسرات
نِثْ.. نثْ يا نجم واغسل حزن ما ماتْ
وانتَ مسافر ويه الريح
عفيه اشلون عتّكْ موت...
وانتَ الكلمة عيب تطيح
يا مهر السبح بالريح
وبزود الشهامه تحزمه الزومات
عيب تضّيع دربك نبت خزامات
عيب المايل يهزك زرك فالات
يمسافر... ﭽذب غير الغشك بعيونك يلالي
وغضب يضوي، وكحل لعيونك الثورات
يلمترّب... على الـﮕصه البخت دِهله...
مريت عله دربي الماي
جرح الهور بـﮕليبك... خذت شوك الـﮕصب..
والحيف، والزينات
تْشَلبنْ بيرغ الفقره
يلبدمهم نبت صبير للثورة... بحزنهم تعبت الدنيه
بصبحهم تاهت النيات
........
واجت روحك، حزن طيره، ذبحها العطش.. وإشتاﮔت
شهـﮓ بيها، ونده ماي السلَف.. كَامت
حـﭽـه وياها: يدنيه الصامتة ويه الظيم
يحزن الوادم، وليل الفرات المالح...
الكلش حلو ومالح
صعد نشمي بذرة الزينات ظل شابح
نهض بيها الشرف، واندارت الرايات
زغرت عالنذل، وتندهك ولايات
طُبُ إلها الصبح... واترسها هلهولات
............
وانتَ هناك... صمت البيرغ المسبي،
تجرحك وحشة الحيطان.. سكته ترد
ياخذ روحك الصبير ويورّدْ
زهه ورد البراري بليل من حسّك فرح ينـﮕط
لو جاس الصبح طولك فرح ينـﮕط
تمر بالنار وتعيّد
تشوف الدنيه عطشانة، ونده مامش بعد بيها
تشوف الناس ليل الخوف ياخذها ويوديها
يجي بسيفك صهيل الدم
يجي الواهس ذبح خنجر... حزن من سالف التاريخ يتلملم
يغيظ المات تذبح صرخته الحيطان
يا حزن العراق... وهيبة الموحان
يمسافر حنين... وغيظ
يا طيبة برد بالـﮕيظ
موحان...
موحان اليجي بدنيه العطش موحان
يا راوي النخل يثمر... ويشب الزرع
ومعبر سلف عطشان
وإحنه...!
احنه بلا وجه... امترّب دربنه...
بلا سفر ونموت
تاخذنه الشيم بسكوت
واحنه المستحه التعبان
نتحمّه بضوه الإنسان
والإنسان...
بس اليصهل بدنيه التعب...
موحان
31/7/1969
رد مع اقتباس
المشاركة الأصلية كتبت بواسطة شذى الربيع
