استفلسينه.. استفلسينه
خويه يابو اعناد بلجي اتحن علينه
حرت بصبيح ,حصرني ايريد
دينه
واحنه حته الفول , والمحروك اصبعه
والفلافل اصبحت حصره
علينه
انغني يمديحني , مو كافي العذاب
كله بيض وخبز مو صدك
خوينه
وانتخبناكم , لان عدكم شعار
[ نعم للانسان ] جنتم
حاملينه
واعتقدنه , انتم اهل جلمه وعهود
وهذه كل السبب وياكم
بقينه
تالي يابو اعناد , مديونه البلاد
وخارج احساباتهم كلنه
صفينه
خابر اليابان واسأل , شان شين
وكله ياشن شين [هاومج]
تندعينه
وروح ابوك ازناد , حماي الديار
ابو الويو ابليل حملهه
الخزينه
اوداعتك , ما ظل قرش بارض العراق
وصدك افلسنه وتديحنه
ودوينه
لا اتكلي : الصار من سوء اختيار
وروح خاجيه , يبوعنيد
خطينه
شكد قرينه , ابكتب عن ضحك الذقون
مثل ذوله الناس صدك
مالكينه
كشولونه , وصرنه غربه ابهالبلاد
وكالت الاحزاب جا
المن اجينه
نزعونه اهدمونه , وكالوا حرام
انخاف من اهدومكم تعتب
علينه
صلخونه اصلوخ , جدام العباد
وشمتوا كل الخلك يزناد
بينه
اجريو عده انعال , من غزوة تبوك
صادروه , كالوا غدا حافي
تجينه
وحسنه , اجتهم داويه وتشكي الحال
وكالوا انتي اهواي زنكينه لان
جدا سمينه
ومن اجت حمريه , كالوا لا تجين
هاي بس اعظام ,واتجذب
علينه
ومن اجاهم حجي خنجر , من بعيد
كالوا المن جاي , موتاجر
دهينه
ومن اجه العيبي , يطالب بالحقوق
ما ايحس اله ابربعهم
شايلينه
ولك قر واعترف , اين الدجاج؟
وصاح يااخوان درب الشرده
وينه
ومن اجه اجريو وزبون وعون , صاح
صوت ما نطي تراهه اتظل
سنينه
من نعاتبهم على مال العباد
كلهم ايكولون الكم
ضامينه
وكلهم ايكولون ياشعب العراق
احنه ندري اكلوبكم كلش
حنينه
وابصراحه افلوسكم , متأمنات
عد ابو سرحان صاحبنه
وخوينه
واليريد ايروح , من ارض العراق
هايه ارض الله مفتوحه
وامينه
الله وياه , هذه مفتوح المطار
وهاي فرصه وموش كل
فرصه ثمينه
اوكون حافي ايروح, ويقدم لجوء
وما انريده ايروح مثل
الطاردينه
وكون, من ينسأل عن هاي الحزاب
ايكول : والعباس هاي احزاب
زينه
واحنه سهلنه السفر لهل العراق
وبعد سوينه الذي يطلع
بدينه
احنه ما نطلع ابد , من العراق
وكل فرد من عدنه ياخذله
مدينه
اوكون , من ايشوفنه انحمل الجمال
ابد مايحجي ويفك حلكه
اليجينه
وليظل ايدردم , ويطلب حقوق
انسفره للصومال وانصعده
ابسفينه
ومن نشوف القرش في وسط البحار
انشمره , وانكل للقرش
قرقش خوينه
استفلسينه ..
ومادرينه اللي ايخون الناس
يتمختر وما يعرك
جبينه
الفاس طك بالراس , يالتعتب
بعد شيفيد , لا تعتب
علينه
جنه سكرانين , صدكنه الوعود
وبعد ما كلشي انكشف عدهم
وعينه
وكلنه لليعتب علينه , الراح راح
من بصمنه احسبنه يالتعتب
عمينه
احنه ناس انصدك ابجلمة رجال
اوقعينه, البلد بايديهم
رهينه
واليصون, ابخيت , واليخذل هزيل
والمثل مكيول [ كل واحد
اودينه]
واقع حال
الشاعر الكبير عباس طريم
رد مع اقتباس