درر العراق

ملاك96 · 11/June/2016

السلام عليكم اعضاء و زوار منتدى درر العراق

قبل فترة سويت قناة ربحية على اليوتيوب وردت اربطهه بكوكل ادسنس فبحثت عن دروس باليوتيوب حتى اعرف شلون اربطهه .. تابعت عدة مقاطع مال فيديو وطبعاً كل فيديو شكل لكن اكثرهن نفس الفكرة , ففهمت شلون اربطهه ..
لما اجينه اتبعنه الطريقة مالتهم , طلعت غير صالحة للعراق وتسببت في حضر القناة :(

والسبب ان العراق ما عندة رمز بريدي .. حسب ما فهمت انه كان سابقاً اكو رمز بريدي للعراق , لكن حالياً لا ماكو هالشي ..

بعد التفكير والبحث طبعاً وباستشارة من موظفة تعمل في مكتب للبريد بجامعتي .. سولفتلهه عن شغلة العنوان والرمز البريدي وهي الي كالتلي ان ماكو بعد رمز بريدي للعراق .. ففهمتني شلون اكتب العنوان .. طبعاً اني ما كلتلهه اريده علمود اربط قناتي باليوتيوب ..

المهم .. لا تنسون هسه .. مقاطع الفيديو ع اليوتيوب غير صالحة للحساب العراقي ..
وهاي الطريقة الي حأوضحهه هي عن تجربتي الخاصة .. بعد ما انحضرت قناتي .. طبعا نجحت هالتجربة عندي ويا قناتي الحالية لذلك اكتبهه الكم حتى تستفيدون منهه ..

اولاً .. لازم القناة الي تريد تربطهه بكوكل ادسنس تحتوي على مقاطع فيديو مؤهلة لتحقيق الدخل وغير محمية بحقوق النشر او تحتوي على محتوى محمي بحقوق النشر , وان يكون مر على انشاء القناة يومين على الأقل

ثانياً .. تتبع الخطوات الي راح اوضحهه بالصور ..
- تسجل دخول للكوكل بحسابك الي انشأت عليه القناة
- تدخل اليوتيوب
- تفتح استوديو مبدعي المحتوى .. أكيد اذا انت صاحب قناة حتعرف وين تلكَاه

- بعدهه تذهب الى ( القناة ) ومثل ما موضح باقي الشرح بالصور ..

تدخلون على ( ربط حساب AdSense) وتكملون مثل ما حتشوفون بالصور

هنا الخطوة الأهم بالموضوع .. وهي العنوان

طبعاً اول شي لازم تكون فتحت صندوق بريد (هذا الي يستلمون عليه رسائل وكذا) عد اقرب مركز بريد بمنطقتكم , بمكان دوامك
اني فتحت صندوق بريد بجامعتي وكلفني 25 الف فقط .. وانطوني وصل بيه رقم صندوق البريد مالتي وبيه اسمي وهالاشياءات ..
المهم بدون صندوق بريد مراح تكدر تكمل هذي الخطوة .. والسبب لأنه انت مراح تدخل عنوانك هنا !
راح تدخل عنوان صندوق بريدك ..

فصار واضح ان العنوان الي راح تدخله هو عنوان صندوق البريد ..
حتلكَ اربع خانات مثل ما موجودة بالصورة ..
الخانة الأولى تكتب بيهه العراق , بغداد
الخانة الثانية والثالثة تفصيل للمكان الي موجود بيه مركز البريد الي بيه صندوقك
والرابعة الي مكتوب عليهه الرمز البريدي حتكتب بيهه ( رمز الصندوق الخاص بك ) الي موجود بالوصل

و أخيراً إرسال طلب الأشتراك ..

وان شاء الله حيقبلون الطلب خلال 24 ساعة ..

طبعاً فائدة صندوق البريد مو فقط حتى تكتب العنوان , انما بعد ان توصل ارباحك بالقناة لل 10$ راح يرسل اليوتيوب الك pin code مدري اذا كتابتهه هيج صح او لا

المهم هذا الكود حتدخله بعدين بنفس اعدادات الادسنس حتى يطلبون منك وسيلة تستلم عن طريقها الأرباح مثل الويسترن يونيون او الماستر كارد ..

********

اتمنى ان يكون الشرح واضح ويفيدكم و اي استفسار اني حاضرة ..

تحياتي

ملاك96