............. الغانمـــه ................
............................... عبد الكريم القصاب
صير كَدها ولا تشج فاله ابكَفاي
......................هـــاي خطه وفنك اتظل فوكَــــها
ادري ماتـثبت بالمكَابـل اويــــاي
......................تضم راسك مثل روس ازكَوكَــــها
للعراضه الخيل ومكاون اعــداي
.................... وانت جانيها اعلى شان اتسوكَها
انا يوم المـوزمه ادواي وشــفاي
....................... مايكعني اغبارها وراشوكَــــــها
انا خليت الكدش كلــــهن وراي
......................وجبت من حلك السباع احكَوكَها
دوم ثوب الغانمه ارداي وغطاي
.......................شابكَتني وما تفك مشبوكَـــها
الظعون اتـبـات مامونـــه ابذراي
.....................وما يهمني اشجان تحمل نوكَها
عاد كافي اتغيظني وانت ابحماي
..................... خلها جمرة غيظتي ابصندوكَها
انا من اغتاظ بيّه ايــــــــــوج رداي
..................... واعدل العوجه وخيط افتوكَــــها
لشجرة الخوه اصب من عيني ماي
....................ولو اغتاظ اشلعها من اعروكَـــها
اوياك طولت الحجي كلش اهــواي
................... وانا آجل احجايتي ومنطوكَـــــها
انا احط احجايتي حطة عـــــــباي
...................واعرف اليشريها واندل سوكَـــها
هذا طبعي وشيمتي وهذا سراي
...............وهاي روحي وهذا ودها وشوكَـــها
حاسدتني الناس جي راجح الراي
..................والشليله ابهيده افــــك مطبوكَها
جي اخلي الرمده تبصر من ضواي
................. واطلع الليطه ابـــهدو من موكَــها
جي اطيح اعلى الجرح واعرف الداي
...................واعـــــزل الشفاف من ملثوكَــها
جي ادوس اعلى اخطر واوصل مناي
...................وروحي تلكَط صيدها ومعشوكَها
انا خاويت الجساره من صـــــــــباي
................... والمهابه طوّكَتني ابطوكَــــــــها
الغبُر مانعني عنهن مستــــــــحاي
.....................والنظاف ابلا اثــم لاحوكَـــــــها
ما امــــــطّك يمها وانطيها كَــــفاي
..................... الراد لــذتها لــــزوم ايضوكَـــها
انا الـــــكَط الراويـــه وبمشتــــهاي
.....................وتنحني العيطه عليْ بعثوكَــها
هذا انا امن اصباي ، والناس المعاي
.................... ما تميْز الحوم من غرنوكَـــــــها
ناس ماتعرف تحط ذيج اعلى هـاي
................... حتى ماتندل مجان احلوكَــــــها


خطه : ساحة نزال
المكاون : النزال
الموزمه : الحرب والشدة
ذراي : ظلالي
اجل : احترم
الغانمة : ماينسب للشجاع من بطولة وكرم
ليطة : عود قصب
سراي : عادتي
عباي : عباءتي
ابهدو : بهدوء
العيطة : النخلة الطويلة
يكعني : يمنعني