من اول خيط يعكَد روحه عل الشباج لوشالة ضوه بسرداب ...
ويه الوجع عندي عتاب ..
طفيت الحركَـ بالروح .. وشرعت العمر بستان
رجيته اعلى طين الهور ما شوفته صم تراب ..
وخميت السنين اللبستهن ثوب .. وبيهن دورت عن جيب ما مفتوك ..
ضميت النسيم الهاب ..
وما خليت شك اباب ..
ومدري منين طبت ريحة العطاب ..
وافتح باب واغلك باب
واغلك باب وافتح باب
والكي الروح كسرة خبز جوه الباب ..
امشي بواهس متيهين .. ما أندل منيتي منين .. بس ريحة دمع شميت فوك الطين .. لحكَته ووجدت بالظلمة خوش صواب ..
حطيته عالرآسي بليل والهث خوف ..
والكَمره وحش والنجم لم ضنياب ..
والريح التعت بالثوب جف ذياب ..
وطك فيهَ البياض براس جان من الحزن يحلم يلبسه غراب..
بهذا الخوف والوهواس ..
وبس ظنون تمشي وياي مامش ناس..
لكيت الشجره كَبعت روحها من العيب..
وكَصايبها الخضر من خط عليها الشيب..
شما رادت تضمها يكصها جف حطاب..
وطحت جلمه غريبه بلا شكل لا لون مدري بيا طواري انجاب..
لا انه بكفرة السكران تالي الليل
ولا دعوه بفجر واطلع من المحراب..
ولا ارهم شعر ويخطني شاعر شاب..
ولا تيهت روحي بهيمة الجذاب..
ولا بيه عشك وانحجي بخلوة ليل
ولا غيبة نثايه بسالفة شياب..
افتح باب واغلك باب ..
وضميت العمر جوه الضلع عصفور ..
من شفت السما فرعت كبال الناس
والمطره جمر والغيم يحجي بواهس التنور..
ومن شفت الوكت يسمع غنه الدفان
ويكسر حجل بنت الولايه الجان
فوك خدودها يغني السمار بطور احن من طور ..
ومن شفت الطفل مهزوم من العيد
ويسحل وره ثيابه خويطره المكسور ..
انه جافل كبل ما بيه تندك باب
وشلت خوفة نهيبه بعمر تسع شهور ..
التم عل الجرح شيله بشعر مبخوت
وبانت من وراها ظفيرة البلور..
أطش عمري بوكت مالكَة الطايح كَاع
وماردت العمر بس من صرت مجبور
وأصفن ع الصبا الخلصته دمعة بعين
وأنشد علكَـ بيد المايحب يزور
انه ديرة وجع بس ما حظيت بناس
وانه دفنة ولف بس ما لكيت كبور ..
رجف قلبي بوكت جانت الدنيا بخير
ثكَيلة وبت مضيف ومو بطيش ادّور
واعطش مثل نثيه وفزت بكابوس
رغم نايم جنت وبحضني نايم هور
رد مع اقتباس
المشاركة الأصلية كتبت بواسطة Murtadha AL-hilfy
