هنا

[^-^بطيخة^-^]

الصراحة احساسي جان يكول اي
بس حتى اتجنب بعض الشغلات كلت لا
ف"اي" انشري تصاميمج

هههههه لعد ما كلتي اي ليش خالفتي احساسج
هههه اوك
..

[قـَســم ✞]

صار عندي فضول اصير اختج لين حياتج مطابقة لحياتي نفس المأساة
لروحج الف سعادة ومحبة

[^-^بطيخة^-^]

صار عندي فضول اصير اختج لين حياتج مطابقة لحياتي نفس المأساة
لروحج الف سعادة ومحبة

ههههه والله ضحكتيني ،
الله يكفيج شر المأساه والحظ السيء والقدر المُتعب ، ويكفيج شر كونج اختي هههههه ،
لانو متتحملين اخت مثلي ، ونمط عائلتي اكيد ما راح يعجبج

و لك المثل حبيبي
..

[^-^بطيخة^-^]

من اقسى الحظات المزعجه عندي و االلي تمر عليا هي من احتار اكمل المسلسل لو لاء ،
غالباً يصير عندي هالشعور من اتابع مسلسل والبطل يعجبني ، ويبدون الابطال يحبون بعض بس تالي يبدون يميلون الاحداث وكإنو البطل بدا يحب شخصيه ثانيه او البطله كانو تبدي تحب شخصيه ثانيه اللي هي شخصيه رئيسيه من المرتبه 2 ،

هسا دا اتابع مسلسل كوري وكلش حبيته وسلاني ومن لحظه شفته ولهسا اني بس اضحك ،وصلت بيه حلقه9 وهو 12 حلقه ،
و البطله حبت البطل ، بس اكتشفت انو اللي حبته مو الشخص المقدر ، واللي رفضته هو الشخص المقدر ، وبدت تفكر بترك اللي حبته لانو لازم تكون ويا الشخص المقدر واللي معناه يحبها بجنون وراح يتقبل كونها ساحره وبهالحاله ما تموت او تتحول وحش

واني هسا ضجت ، ما اريد اكمله ويطلع بنهايته انو تحب الرجل المقدر ، اريد البطل يحبها مثل الرجل المقدر حتى تعيش وياه
ومحتاره خاف يصير هالشي واعتبر متابعته حرامات ، وخاف اعوفه ويطلع بالنهايه راح تكمل ويا البطل
وضع مُعقد

..

[^-^بطيخة^-^]

دخلت اكتب شي هنا ، ونسيته ،
*_* !!
..

[^-^بطيخة^-^]

القتل من فتره بدأ بشكل اوضح من قبل

بدأ من المشاهير والناس المعروفه ب مختلف المهن والشهره ،
واستمر عادي جداً انو يلوح الناس العاديين



نتذكر اول شي شخص "اتصور نسيناه" ^^

نوشي ، الشخص اللي كان مسرحي وبحكم وضيفته كان شكله وستايله مختلف وشعره طويل وكذا ،
لگوه مرمي بالزباله ومقتول :) العام الماضي ،

هالسنه

رفيف الياسري ، الدكتوره اللي كان معروف عنها انها سفيره نوايا حسنه كد ما تساعد :) ،

رشا الحسن كانت مديره مركز فيولا اعتقد


سعاد العلي اعلاميه انقتلت لانو طلعت صوتها وما سكتت مثل الجبناء

تاره فارس مودلز ماكو واحد ميعرفها واكيد سبب القتل لبسها

من بعدها انتشر عده صور لمقتل ممرض مو معروف هواي

وراها بيومين مقتل مهندس نفط معروف ب المحافظات الجنوبيه

واليوم مقتل شخص من بغداد اسمه حمودي المطيري ،،



صح العراق من زمان بيه هالاشياء ،
بس اخر فتره ازدادت لدرجه واحد يكوم ينقهر لما يسمع كذا مات وكذا وكذا

مرات احس انو اوك اني من اطلع لازم اخلي ببالي انو اني احتمال ما ارجع للبيت سالمه :/
ومن يطلع اي احد من عائلتي واقاربي نفس الشي ، ممكن اي احد يوكفه بلحظه ويضربه طلقه يوكعه بمكانه :/


مدري شوكت تفرج ونرتاح ، بس الاكيد ما نرتاح ، لانو كل شي يجينا من ايدينا :/


..

[^-^بطيخة^-^]

اكثر شي كسر قلبي هو الولد اللي اسمه حمودي المطيري من بغداد ،
طبعاً مو لان بغدادي وانحياز وكذا :/

بس انقهرت على حاله !! ،

يعني اللي يصور كان هادئ لدرجه انو اني من شفت الفيديو كنت اتخيله دا يشوف لعابه كدامه مرميه ع الارض ،
متحسه كإنو كدامه بشر دا يموت !! ، واكف يحجي ويصور بشكل عادي ويسأل بيه وهو حجي ميكدر يحجي !!
حتى الكافر ما يسويها !
بدايه المقطع كان الولد يگله نروح للمستشفى واللي دا يصوره بلا اي ضمير وانسانيه ولا كإنو يسمعه بقى يسإل بيه !

للحظه تخيلت نفسي مكان المصور !
تخيلت نفسي اصير بهيج وضع مستحيل راح اوكف مثله واصور !
ما اكدر اتخيل نفسي بهالتفاهه واللاضمير وانسانيه ، كنت راح اخذ اقرب تكسي واروح للمستشفى بيه !

حتى وان كان طالب الاسعاف و دا ينتظرهم ، ما يكعد يصوره ويسأله وهو حجي كوا يحجي ! ،،
واللي يكتل من يجاوبه ويكله هاي مصارينك طالعه ! بدل ما يسكت ويكله مابيك شي عمو جرح بسيط ؟


يعني اللي يصور لو ينطوني اياه الا من الكتل اطلع له ضمير واحساس


ونگول احنا ليش الله ما يوفقنا ، ليش الله ابتلانا بهالحراميه والاشخاص اللي يقتلون بينا وبأولاادنا ،،
اذا احنا نفسنا بهيج وضع نتركهم للموت ونكعد نصورهم لحد ما يموتون والله على مود كم لايك وفولو وطشه


وهسا اللي يصوره يطلع يصلي يمدح بدينه ونفسه واخلاقه والتزامه وهو ذره انسانيه وضمير ما عنده :/


شكد واحد گلبه يحترك وينقهرر لانو هيج نماذذج دا تدب ع الارض مثل البهائم و اللي بيهم خير يموتون




..

[^-^بطيخة^-^]

هاللبستين كُلش عاجباتني لدرررجه ، وخاصه الازرق ، راح اموع عليه الا شوي
بس مشكلتي م مجربه اشتري اونلاين وكذا لانو قياسي مُعقد كلش ، فضلا ع انو اخاف نوعيه القماش رديئه وهيج واتورط ، وهالصفحه م الها محل واقعي انما بس ع النت شغلهم :(


دا انتظر القبولات حتى اشوف وين انقبل ومن اداوم اشوف المكان اللي اداوم بيه ملتزمين زي لو عادي الوان ،
حتى اشتري الازرق اذا الوان مقبوله
يعني اغامر واطلب من النت

حسبي الله ع قياسي











..

[^-^بطيخة^-^]

زهراء مُحي من تريد تجلطني *_*


-اني : شلونج
-اووف الحمدلله
-شصاير شو اوف
-هو كله من ورايا
-ليش شكو شمسويه انت؟
-لج بس هو صوجهم
-منو هم ؟
-اووف اني اعلمهم
-منو هم وشتعلمينهم مدا افتهم
- لو ما ناطيتهم عين احسن
-غير تحجي مثل البشر وتفهمني
-لا هيج هاي سالفه خاصه مو مال اسولفها لأحد




طبعاً المحادثه مُخترعه مني مو حقيقيه ، بس تعبر عن وضعها وياي من تريد تشلّني

..

[Ph. Zahraa]

زهراء مُحي من تريد تجلطني *_*


-اني : شلونج
-اووف الحمدلله
-شصاير شو اوف
-هو كله من ورايا
-ليش شكو شمسويه انت؟
-لج بس هو صوجهم
-منو هم ؟
-اووف اني اعلمهم
-منو هم وشتعلمينهم مدا افتهم
- لو ما ناطيتهم عين احسن
-غير تحجي مثل البشر وتفهمني
-لا هيج هاي سالفه خاصه مو مال اسولفها لأحد




طبعاً المحادثه مُخترعه مني مو حقيقيه ، بس تعبر عن وضعها وياي من تريد تشلّني

..

ترا اني مسولفتلج كل السوالف بقت ع هاي السالفة
و هم سولفتهه