إبوطنة الضحكة شردت من ألحلوك
وألعيدية دوم إمزاعلة ألأيد
يجينة إلعيد جان ومامش هدوم
هسة هدوم عدنه ومايجي إلعيد
***********
الحكومه انطت شعبها ارقام ورقام
حته يخابر ويشرح إهمومه
شعب خارج نطاق التغطيه يعيش
إذن شيسوي بارقام الحكومة
**********
وله في الزهيري:
ايام غربة قهــــر نــــيران ويه الـوطن
ودكات كلبي عرك احــــاه علها الوطن
شيطان وسوس الي وبراسي دندن وطن
خلاني عفت الاهل بيت وتركته وارض
كتله دريض ولك بس ما تـــــهده ورض
بالغربة حطوا الي بكل كتر كسر ورض
ومن كطعوني وصل كل وصلة صاحت وطن
*******************
وله في ما يجري في العراق ,بقصيدة قصيرة:
بعهد صدام جام البيت مكســور
ومن البرد ليلـــــــــــك ما تنامه
هسه البيت زين وصار بيه جام
بس كلب العراقي انكــسر جامه
الكراسي كاعده فوك الـــكراسي
لان ماكو زعيم ولا زعامــــــــه
ذله بذلة نكضي الليل ما ننــــــام
والبصبح بالمدرسه ندرس كرامه
ووالدنه الوطن بابا نــــــــــسميه
شو بابا عدل وحنة يـــــــــــتامه
عجيب شكد ايمة يا وطن بيــــك
ووجهك للرحم ما بيه علامـــــه
عجيب وبيك ابو فاضل العباس
عند جف ولا عندك شهامــــــه
ممنوع التجول يا وطن بيـــــك
لان حتى الدرب ساحب اقسامه
وشمل منع التجول حتى العظام
والدم ماكدر يمشي بعظامــــــه
حمام الناس ونته يا وطن حوم
منك ما اظن تسلم حمامــــــــة
انت بروفيسور بقبض الارواح
وعزرائيل الك دنك الهامـــــــه
يوميه قيامه يا وطن بيـــــــــك
اذن كلش سهل يوم القيامـــــه
رد مع اقتباس
المشاركة الأصلية كتبت بواسطة كبريائي قاهرهم
