1ـ الجرح
الجرح رايدله شاعر ..
ايأشر اعله اهلال عيده
اومن يچل القلم بيده ايقط اصبعه..
ومايتاني الباچر ايكمل القصيده
شط العرب
2 ـ أحــلم ـ
گال أحلم...أحلم..
رطــّب جفنك العطشان واحلم
گتله أحلم كون ماأحلم بعـــــد
لأن ترطيب الجفن تهمه خطيره
وضد قناعات البلـــــــــــــــد
شط العرب
3 ـ روحـــــــــــــي ـ
روحي طيره من الجنوب
امفرفحه ابغابة طفوف
روحي أمّ اوتيّهت بزياره ابنها اونيّة الوادم رحيل
وشابحه العين وتطوف.
روحي لعّابه غفت بچفوف طفله..
من صَحَت مالگت أحد.. فقط نظرة رعب مليانه المكان
ومزرعة خوف اوخواطر تقره ملحمة الجفوف
يانهاري العشته آه..
وكاسريته ابليلي أوف
روحي من تضحك تخاف..
وره الضحكه طلابه خاف!!
وتبني من الخجل طوف
اشلون أضحك ؟
وآنه اشوفن غصن زيتون السلام
ابحلگ ضبّه من السيوف.
شط العرب
4 ـ شكرا ًـ
گال اذا تحتاجني مشكول ذمه اتمر عليه
اوهذا كارت..
الاسم: فاضل ابو اصيبع..
العنوان النجف .. معروف في كل مكان
المهنه: دفان..
گتله شكرا.. مثلي مايحتاج مثلك
لأن ميت من زمان!!
شط العرب
5 ـ شاعر شعب ـ
شاعر شعب ..
ومن يصيرالشعب شاعر..
آنه آكرملي الســـكوت
ومن يصير الشعب شارع..
كلمن ايدوسه اويفوت
آنه اشرفلي اموت.. وانفجر باّول قصيدة
اوأبلع السان السكوت!!
شط العرب
6 ـ وطن ـ
مليت ادور وطن..
يندهني من الصبح
يبتسم من ابتسم..
ويبچي لـَوَن انجرح
دورت ماحصلت..
قررت امشي عكس
منجل واحش بالعمر..
بلكت احصــــــل گبر
عالأقل إسمه وطن..
بي اگعد اوأستقر.
شط العرب
7ـ ياعراقي ـ
ياعراقي...
افرش اجناحك قريبه الشمس ماتبعد عليك
واروي غدران المحبه والحلم مابين اديك
ياعراقي..
بينك اوبين الشمس چفين حنطه..
طشها بوجوه التغشت گبل من تمر عليك .
ياعراقي آنه اعرفك ..
منجلك يلهث بديك..
وگاعك من اسنين تربي اعيونها الدربك عليك
ياعراقي.. النخله صوتك ..الفرات ودجله صوتك..
انطي صوتك للّي صوته ابيوم مازاود عليك
ياعراقي..آنه ماخايف غريب عليك
آنه خايف منك ايدور عليك
ياعراقي ..
سهم عاشور ابعدوك.. اوعيد المبارك عليك .
رد مع اقتباس
المشاركة الأصلية كتبت بواسطة ابو وئام
