مثل دمي ، الحزن مسجون ،
حزن يعزف على آعصابي لحن مجنون .
حزن روح وحزن واهس ،
حزن شفه ودمع وعيون .
حزن كلّي ،
حزن وحرورته آبظلّي .
حزن ملعون ،
بس مامـون .
حزن ما عافني لوحدي ،
حزن معشر حلو ، ميخون .
حزن من المعـزّه امدلل ومسجون ،
والفرحه حلم مجنون .
مهموم ، وسكر بيّه الحزن ،........
غنّه مواويلي وجع مزيون .
فيّضني ضوه ............
ايحوم آعلى موكَد نار ،
فيّضني شعر مثل المشابك حار .

حزن ما خلّه شي مدفون .
حلو حزني ،
حزن خلّاني آشوفن زين ،
اسولف زين ، افكر زين ،
حزن خلّاني آحب راسي ،
راس آبلا حزن ، مجنون .
حلو حزني .
حزن ، كل يوم يلجمني ويسلّيني ،
حزن ، كل يوم برماده يحلّيني ،
حزن مزيون ،
حلو حزن العليّه آيدوّخ المرايه ،
حلو حزن العليّه ايركَص المرايه .
كل يوم المرايه تشتهي وجهي ،
وآجيها امعطر بحزني ، وانة الممنون .
أذوب بماي شفّتها ،
وتْمصني بضوه مفتون .
أغط بمايها وكَوه أجر وجهي ،
ومثل كل يوم ،.......
أحط خدها على الحايط ،
واكَلها نلتقي باجر ،
أكَلها ان شالله باجر ،.......
أجيج امعطّر ومزيون ،
أجيج امعطّر بحزني ، وانة الممنون