#التكبيل
وجهة نظري وليس لي اي اغراض او اقصد احد
شنو معنى التكبيل ؟؟ وشنو الاغراض منه ؟؟ وشلون يصير؟؟
اولا اني مااقصد اهين اي احد من كلامي مجرد الي بالي جاي اطرحه
التكبيل هو انه ولد يمشي ويه بنت يكظي الوقت سوالف وضحك وياها وهنا بيها شقين اما واحد يضحك على اللاخ بمشيتهم سوه او تؤدي الى خير وهناء الي هو الزواج
التكبيل نوعين : مؤقت (قشمره) و الدائمي (زواج)
اكره وبشدده اهل النفاق والدجل اهل الطرف الاول
تجي على الولد ليش دا تسوي هالشي ؟؟ والله دا اكظي وقت وين اروح !!! عجيب زين لو اختك تقبل يحجي وياها ولد ويكظي الوقت وياها مثل ما تسوي حضرتك هسة ؟؟ لا اكيد لا !! زين ليش تسوي ويه بنات الناس هيج ؟؟ اممم ماادري !!! حلوو متدري اذن انت بلا عقل لانه لو عندك عقل جان فكرت بهاي البنية انها اختك التي لم تلدها امك قبل لا تكون صديقتك .. الحد المسموح الك بيه انت وصديقتك هاي فقط بمجال الدراسة لا كظيان وقت ولاش ... شوية خلي ينضج عقلنه ونصير كبار بس يوم .. تره تكبيلك هذا من نووع قشمره على البنية ياويل .. عيب بس يوم ارجع لضميرك وحكم عقلك هم يعني الي تسويه ويه البنية صحيح تخليها تتعلق بيك وتحبك يوم بعد يوم وانت جاي تكظي الوقت براسها وخطية مخلي كلبها وياك ودوومها تنتظرك وانت اكيد مو بس ويه هاي مكبل اكيد ويه ثلاثة اربعه اللوخ هم مكبل الله اعلم .. زين مو عندك اصدقاء من جنسك ليش ماتكظي وقتك وياهم ؟؟ ها مو اضوج غير ننوع !!! عجيب تنوع شنوو .. شنو هي مزعطة او البنية لعبة بيدك تتحكم بيها شوكت متريد وتاليها تتركها ... البنية تحبك وتريدك وانت تجي تاليها يابنية منو انتي مااعرفج وتكسر كلبها وتكسر جنحها وتكسر نفسيتها وتخليها تكره الحياة عن بكرة ابيها .. زين مافكرت قبل لو صار هالشيء بأختك الي هي قريبة شراح تسوي انت؟؟ ..
تجي للبنية ها عمووو شنو منو هذا الولد الي وياج ودا تمشين وياه وتكظين الوقت كله وشقه وضحك وياه .. تعرفيه ؟؟ تعرفين ماضيه ؟؟ تعرفين شكم بنية تحجي وياه لمن يرجع للبيت ؟؟ زين ليش مشيتي وياه اصلا ؟؟ .. اكيد جوابها الولد حبيته شوية صار شقه وسوالف بيننه بالمحاضرة او المختبر ونظرات متبادلة وحبيته !!! صدك تحجين زين تعرفين شنو نواياه ؟؟ اكيد لا .. يا بنت الناس تره الولد الله يستر منه يضم الف سالفة براسه ويلوفها مو بسهولة تلكين شيء منه واكيد ميكلج شيء الشيطان قووي ...
يابنت الناس حرام الي تسويه ... شبلعجل نسيتي شيبة ابوج الي طارد وكضه عمره علمود تكبرين شبلعجل نسيتي دموع امج لمن تمرضين لمن تبجين .. بالله هاي طريقة توافيهم بيها ؟؟ هاي طريقة تجيبين الرحمة الهم ؟؟
*رجاءا يابنت الناس ارجعي لعقلج وافهمي نوايا الولد من الاول قبل لا تصيرين اداة بين يديه يلهو ويلعب ويكظي الوقت وانتي تشقين وتتعبين ببناء اشياء واخيال ستذهب ادراج الرياح وتكون اهون من بيت العنكبوت بمعرفة الحقيقة الصادمة
بالنهاية تره تربية الولد مو شرط تعكس تربية الابو والام لانه المجتمع الفاسد ينطي انطباعات فاسدة على الافراد وتكتسب بشكل سريع وتتغير تربية الولد السليمة الى تربية فاسدة منحطة ومو قصدي ترضاها لاختك انه اختك (حشاها) مو خوش بنية بالعكس بس قصدي يعني اعتبر البنية الي جاي تكظي الوقت وياها اختك وولد يحجي وياها اكيد كلبك راح يعصرك وغيرتك راح تصير نااار عليها وتتعارك لذلك فكر
بالاخير الولد والبنت كل منهما ملام على فعلته والاثنان عليهما السبب فليتحملوا النتيجة
كل الي كتبته مجرد تصارع كلام بعقلي وحطيته
#انتهى
#بقلمي
تحياتي لكم
رد مع اقتباس
المشاركة الأصلية كتبت بواسطة العراقي راقي*
