اظن وكت الملاكه اتقرب هواي
واشوف اعيونه شكد شايلة عتاب
عليمن منطي ظهرك هنه خطوات
واصيرن لكمة هيج بحلك التراب
واشوف استعجلت بفراكك وياي
بعينك ماقريت وشفت الاسباب
تهز طولك لغيري وتركض وياه
وانه لملكاك روحي اتفصلت باب
كشخة اليسف لمعه بوكت الحروب
لجن تكمل حلاته بحضن الكراب
حضن الكاع بارد حضني تنور
وصيت الطير يفرق عن الغراب
الكحل كلش حلو من تشوفه بالعين
وبعد وين الحلاة لو عالجفن غاب
تعال برحي ملكه يكعد المييت
ويرد حته العجوز يكوملك شاب
واحظرلك سوالف كلهن زغار
والبسهن عله اذنك طاري الحجاب
الحسرة البيه تطلك توم مرات
بجفاك وموش باصبع بالسوالف ناب
شلت بروحي حركة اتذوب الحجار
بحيث حروفي تطلع كلهه عطاب
لمن شافوهه بيه اتكاطفوني بماي
نار بروحي شبت والكلب شااب
هيج انه بغيابك واهلي بالبيت
واحس فصلية روحي بنص االاغراب
واستاحش غرفتي البيهه ظليت
منين اندار ذكره وحاار الصواب
مثل عانس واجو خطابة للبيت
فرحت ..بس لاختهه الجاي خطاب
كشجرة وماكو ماي وجاهه اليباس
ولمحت من بعيد ايدين حطاب
اشوف الموت لمن بعدك يطول
واشوف الناس كلهه محضرة الركاب
بعد مو شعر كمت اظفر جروح
واضمهن يم جرح لساعة ماطاب
الضيم البيه اذا تجه اعله حيطان
يوكع بالارض وتصير سرداب
تعال لريتي عطرك يرهم علاج
تعال وخلي نعلن عالهوه اضراب