أنه بنادم صدگ ما حط لظهري جناح
اذم واكره واسولف واحجي كلشي الچان..
وما خطط لضحكه ولا لدمعه عين
ولا احزن چذب حتى أنعرف انسان..
من تصهل ضحكتي اعبر لذاك الصوب
ومن تنشغ دمعِّتي مناشغ المعدان..
على الفطرة من اسولف ما تهمني الناس
ولا ادور صداقه بگعدة الديوان..
وتره اليغلط بحقي انطي وجه عريس
يحس زافوف اريدة ولا يحس غلطان..
متناقض لان عايش طبيعي وياك
الما عنده تناقض هذا مو انسان!..
تجيني ايام احن لريحة العاگول
وتمرني ايام اذوب بريحة البستان..
وتصح مرات امر نسمة بصدر فلاح
وتصح مرات اشح بشهگة عل غركان..
انه غير السمار بوجهي ما مش لون
وتمرني سنين أضيع وتطگ بيه الوان..
جنحي من انفتح ما زاحمت عصفور
ولا غرني الصياح ونافست خرسان..
تعيرني بعشرّتك من چنت وياك
وگلبي بعشرتّك كلة أنترّس دخان..
أنه مسير ضوه لسردابك المسدود
بوكت شمس الظهر ما دگت البيبان..
:::::::::::::::::::::::::::::
ادهم عادل
رد مع اقتباس
المشاركة الأصلية كتبت بواسطة *نجمه النجوم*
