اقترب موعد زفافك واستعديت
لوجه العشرة اقدم روحي قربان
هلاهل زفتك وصلتني للبيت
وصرخت بصوت فزز سبعة جيران
الناس الزفتك موش امن البعاد
وسفه الكبل جانوا ليه صحبان
من كثر الدمع ماوجد الناس
الشايب ما اميزه ابين شبان
ماشارب خمر بس دايخ اهواي
امر بالشارع ايحسبوني سكران
شيسكت الشماتة الما يرحمون
سوالفهم وكيحة ادوخ اﻵذان
منشوفن زفة احسن دمعتي اطيح
لحد ماتحفر اعله خدودي نيشان
بعد ماطب عرس لو شنهو اليصير
الذابل ماله دور ابين اﻻغصان
كرهت اسم العرس من يوم زفوك
من يوم الحليت ابعينه يفلان
انه شايف بشر متبدل الثوب
ووصلت حالة بيك اتبدل انسان
بواحد ما اظنه ايوافي وياك
الف مرة عشك وتولع وخان
النكر عشرة حبيبه وراح للغير
الله ايحاسبه اعله ازغر ذنب جان
اﻷخذ ذكره الحبيبه وذبهه بالنار
خوش امحضر الله الجسمه نيران
الكشف سر من حبيبه وهوه مدفون
باجر بالنجف مايلكي دفان
ابذمة كل نهر من ينشف الماي
العكد صوج النهر من يبقه عطشان
سفينة نوح تدري ابنيه الناس
تدري البيهه يصعد جابه طوفان
الشلال اليطيح اتحظنه الكاع
ويجي ايبلل كلبهه الجان عطشان
وانه طير وطحت من عالي للكاع
غريب وماحظيت ابملكه اﻻحضان
رد مع اقتباس
المشاركة الأصلية كتبت بواسطة zeto
