دوهنتني..
وفرفحت نبضاتي بيك..
يالسمارك تارس عيوني عشگ ..
يلي بيك الله نثر كل الورد ..
منتظرتك ..
يادفو اليخزر بعينه من يمربيه البرد ..
يالرسمت احلامي بيك ..
ياربيع وكل خضار بروحي ينده
مشتهيك ..
غافية اعيون المحطة وباقي اتاني
منين ماشمك تجيني
ارسم ابالي درب
وچني اشوفن وجهك
بكل نجمة لمعت
ماشية لديرة غرب
فدوة تاني ومدلي ايدك
خل اصوغ اچفوفي لچفوفك محابس
وهاك اخذني لديرة اشوفن
گاعهه تخضر عرايس ..
من لگيتك ..
وشلگيتك ..
غافي بحضان الشواطي
منتظر روجة التضمك
ياحضن ينگط حنين ..
اترف من احساس شاعر
عاشگ يغازل حبيبه انفاسه تشهگ ماتجين ..!
نثّت الغبشة هلاهل ..
نسّمت بيك الفخاتي ..
وغنّتك ذيج البلابل ..
ولاتسولف
فدوة مو تدري رچيچة
واغرگ بهمسة محب ..
وانت صوتك ..
اه يصوتك ..
يسحن بروحي ويرگّص چم ذنب ..!