تعاي الملكه حتلو صار
سجينة بنحر مذبوح
ترضه الروح
اريد الملكه كون يصير
الف روجة بزند سابوح
تعاي وروفي بالي الشدهته الحسبات
تعاي وخيطي كلبي منين ما مجروح
حتلو نار صرتي ارضه
واصيرن دلة يمج تنجوي وتفوح
تعاي بلهفة الخطار
اكعدي وضوكي فنجاني
تعاي الشوك هزني هواي
عضم بجلد خلاني
وعلي مرات اغازل بالسمه النجمات
واتخيلهن خدودج
تعاي البعد كلش طال
اريدن ملكه حار ويرهم بزودج
دخيلج وج دخيل الله
هينه عليج من بلوعتي اتكله
وفراكج رصاصة وفاركت شاجور
والفركنه بارودات يعني ابذاتنه العلة
تعاي الخاطري المكسور
بس جتافج تشله
تعاي شبيج لا ترحين
تعاي الوجع مدري منين
تعنيلي رصاصة ارد امتحن خوفي
اشبكج واحتويج اسنين
اضمج حلم جوه العين
خاف تضوجج جفوفي
تعنيلي بلم غركان
واجلبي بطينة جروفي
تعاي شمال طولج مال
كلبي سمال يعني بحركته مشكك
تعاليلي جتف سابوح من بعد 12 بليل
خاف ابدمع عيني اغرك
تره العاشك اذى يشتاك
مو بالماي بالنسمة يظل يشرك
تعاي الماخذج ما يسوه كلمة شوك
تعاي وطفي كلبي البل قهر محروك
تعاي وسكتي جوم حلوك
تعاي وردي حلمي المن وكت مبيوك
رديلي الخذج ما يوم طوله وطولج يلوكن
تعاي شظلي بس مرتين اشوفه وياج واتسودن