من جنه اصغار ،آني و اخويه الاكبر مني ، ما جان عدنه شي نتسلّه بيه غير ان نقلد الابطال اللي نسمع عنهم، مرة نقلد هرقل و مرة عنتر ومرة سوبرمان... بيوم من الايام اخويه الجبير شاف فلم روبن هوود و عجبته الشخصية و راد يصير محترف بالقوس و النشّاب.. سوّاله قوس من خيزرانه طويله و السهام سوّاهن من شياش التكه، و بده يتدرّب عالنيشان اكثر من شهر الى ان صار ينيشن على عود شخاط و يضربه بلا اي غلطة، وآني جنت اتابعة يوم بيوم... فصارت عندي ثقة عالية بمهارته... و مرّة من المرّات كال: تعال نسوي مثل ما سوّه روبن هوود.
كتله: وشسوّه؟
كال: حط تفاحة على راس ابنه و ضرب السهم بنص التفاحة.. وآني هسه صرت كلش زين وهم اكدر انيشن عالتفاحة اذا حطيتها على راسك.
وافقت عالفكرة، طبكت ظهري عالحايط و خليت تفاحة على راسي و وكفت عدل.. اخويه وكف جم متر كبالي و بده ينيشن عالتفاحة.. و ضرب شيش التكه.. و جان يطب بجتفي اليمين حوالي عشر سنتمرات!
الله ستر و ما اجه بكصتي لو بكلبي...
رد مع اقتباس
