نسيت انساك كلي شلو ناسيك
كالولك نساك وما تجي اباله
و انه يمكن بعيد الجسد بس البال
كل ليله بسماك ينور هلاله
انه حبي الك جن اسد بابل صار
ما هدمته سنينه و باقي تمثاله
و مثل ليل العراق العشك صار وياك
اذا مو كهرباء يضوي باللاله
يعني بكل وكت و بكل زمان اهواك
بهمي بشدتي بالرخو بكل حاله
و ما يبقه وكت عندي من افكر بيك
الوكت يخلص بصفنه و اطلب جماله
عله الحايط ادور رسمك من اشتاك
و اتخيل جمالك و اكعد كباله
و اسولف وي خيالك عله الحايط دوم
و كلمن شافني اتخبلت حسباله
حته دموعي خلصن من بجاي عليك
و هسه من القهر جاي ابجي الوشاله
انه حيل امنياتي انتهه وكلش باد
امس عندي امنيه انشالت بنقاله
و امس عندي دمع ما رضه يعوف العين
ظل بين الرموش بحسره يتلاله
اليخسر دنيته يكدر بعدهه يعيش
اذا عنده محب مستعد يبقاله
و اليخسر محب ما ظن بعدهه يعيش
شني معنه حياته و حبه ما ناله
و انه مستعد اخسر كلشي حته الروح
بس كون انته يمي افراحي تتعاله
رد مع اقتباس
المشاركة الأصلية كتبت بواسطة الحالمة
