لاگــــــــــيتچ
لاگتني وتبده المطر
جاستني وحتر الگمر
عشگ الصرايف بينه
شفنه الفصول الأربعه
يتوسلن بس الدفوا
گالنه يله تشابگوا
شبگتكم أتدفينه
تگربنه أكثر من بعض
وعيونّه المن خجل
غمظن يم رجلينه
مدت أديهه وسلمت
وبين أصابعهه عثر…
وجهي ودمعتي تمددت
غازل گصايبهه الهوه…
وگذلتهه عالگصه أنچفت
لميت روحي من الذنب
من جاس شفتهه البرد
وآنا أدري ينزف بس عطر
من ينسحگ راس الورد
گالتلي ميت….. لو عدل
ما عفتك ب هالحاله
گتلهه اليعيش بسجن
يفتهمه بس الحايط
يرسمله صوره من الحلم
يشبگهه… خل حسباله!!
أضحك وسولف بالوجه
خيط الشمع من يشتعل
يوص ضواه لذياله
بس أنتي…. حليانه شكثر
ياروحي…...حليانه شكثر
حلوه وعروس چماله
طايحلچ هواي العرس
هنــيالچ وهنــــياله
بخدودچ تبات الشمس
والمغربيه أمن الشعر
تركض ركض چتاله
لاگيتچ وما ميزت
من خصرچ هلال الشهر
لو خصرچ أمن هلاله
گالت فراغك ما زغر يكبر أشما لميته
أقره الحچي المابي الك
والگاه چذب… وجه الحرف
روحيتك أمحليته
بارد مكانك والدمع بلل تصاوير الجهل
حد ما صنم رسموني
وجهك رسمته عله الشمس
وعيوني عباد الشمس
كلما درت عني الوجه
وياك أدير عيوني
عندك علاقه أوي الهوه
خيعونه مو خيعونك
لو غازلت غيرك يجي
ويعرض گبالي عيونك
أشتم شبگتك من يمر
بعيوني طاري شلونك
وتبده يم أهلك حضن
چيفنهم أيشبهونك
رديت مكسورة ضوه!!
يا بابنه شو ما أجوا… ..حنيت بس أتعطلوا
چا ليمت أيدگـــــــونك
گتلهه گد ما دورت
كل شارع أدخله عرف
كل باب أدگه وينفتح
ياهو أنت ؟ شمضيع ؟ گلت
ما مر عليكم شي ترف
گالولي مفضوح المسچ
من تنظم الترچيه… ..عن
عين الحسد مو عالزلف
خل يوگف بزفة عرس
كل واحد مضيع ولف
لحظه….. انگطع مجره النفس
ما أدري… .غيري أيريدهه
صاحلهه ها… .وتطشرت
أيدي أمن أصابع أيدهه
منقول
رد مع اقتباس
