وهله
نغطة جنين
وصوغتنه اعيونهم طابك دنان
لبن شجوه
وجلمه مكطوعه نفس طول السنين
وعين عين انشدت ابتالي الطوارف عين عين
وعين عين ابلهفه تنشر عالسوالف عين عين
وعين لمتنه ابحزنهه وزوكت وجه الجرح
وعين نشدتنه ..من اجيتوا
ولاعثر يم الصبح؟؟
هلي ..
وزتتنه الضفاير
والضماير
والخناجر
والدفو الغطه الجفوف
وجانت الهلهوله خرسه..
تضيع بالشفه وتطوف
الكاع من يكبر كلبهه
يشب عشبهه
وتوصل احجياتهه
التالي الجروف
هلي..
وسيرتوا عليه ابوحشتي
احجايه بريد
وبيت نايل
واشتهيتوني اكتب الكم
عين وفه البردي
وحنين الماي
ودموع السنابل
وعيون التلم الليل دمعه
وتعتلك وكت الوفه
اشموع ومشاعل
وعن الكلوب التموت
بلايه اسم وبلايه رايه
وعن شمس طلكت بسهمه
وعسرت باول قضيه
وغربتي ..
وصوت النواعي ايلوحني
ويلتم بديه
الصوت بيه ريحه اعيوني
وبيهه هلي
اوحشة مسيه
(هلي يامن ضيعوني )
وكحه النفس ماتفعل تلين
منبت حزن ومخالف سنين
الليل لو سد الروازين
شمسين حمره ايخضر الطين
ها يامن ..
وهيه هيه العين تكضي السوالف هيه هيه
وهيه هيه الكاع من تجفي وتوالف هيه هيه
هلي ..
وشرعني هواكم باب للخطوه الغريبه
وخايرتني اعيونكم
ذل لو جتل ؟؟
وانه والموت التحمنه
ابمايكم ..ساك وحجل
الروح شاخص
والعمر بركه كمر
والموت ظل
اويه كل لمضه زمر كلبي رصاصه
اوويه كل لهبه
اصرخ بدمي
اشتعل
الدنيه من ايشح ضواهه ..
الدم ابكل حيله يهل
هلي ..
او أخر مكاتيبي كتبته الكم
عله الكاع
ابنكم باعته الدنيه
ولا باع
ابنكم باعته الدنيه..
ولا ...باع
رد مع اقتباس
المشاركة الأصلية كتبت بواسطة ضياء الصافي
