خضر الياس
كل خطوة منيه
والصوايح صوت
مابين القفل والباب
مابين الستاير والشمس من تهجر الشباج
والصفنه وجع ياكل ابلب الروح:
وين انروح ؟
وين انروح ؟
ياروحي وبدينه انشيل ضبه اجروح
لذتهن نزفهن فوك الكاع
اروح اهلنه اتفوح
ويادمعات امس بعيونه اشحلاج ؟
عن ياويل تبرد نارنه
ونضحك ولو بالطيف
عن لاننكسر
وتكول عنه الناس مهضومين
واحنه اسنين بس هضم العلينه
لو على الايام
جان ابساع يطفن
واحنه ماطافين
نتبسم غصب
بس الوجع بالروح
لاذله املاكه
ولادمع مفضوح
بارينه الحزن سولة حمامة دوح
(وشيسكت حمام الدوح من ينوح )؟
يا المن غديت امشي بجدم تعبان
يثكل بالحدائق
بالدروب التجمع الصبيان
يسرع بالمكاسر
والضنك
والصوت
حتى الموت صار ايشيل خشمه
من علينه ايفوت
وندكله رجل ..هلبت علينه ايطيح
يشبخ معتمد
ويشرعب ويه الريح
انصيحه
انجر عباته
انفززه من ابعيد
يتباهه ابغلاته ومدري وين ايديح
رتب خاطرك
يبن الامس واليوم
واكعد بالشريعة اكبال خضر الياس
واشعلهن اسنينك
بلجن الغياب
بلجن بالجذب يندك عليك الباب
والله الحزن واهس
والصدك جذاب
واصبرلك بعد عشرة وعليهن زود
عودك ...عود يابس
ابد مابيه فود
يارمانة الله
اشطيحج للكاع ؟؟
والكاع اصبحت
زنجه ونداوة وطين
ياشمامة الاخبار
والسمار
والطيبين
يمدلل..يبوا تراجي ذهب
وعيون خطافات
يالماتت الدنيه
وواهسك مامات
يبن احلى غزاله وابن ذاك الحيد
ياعربيد
شو صاير تزل لو راد واوي يصيد؟
اي ..ايه اي...ايه
الدنيه درب نمشيه
ابكل مابيه
والزين الذي يكدر يقاوم بيه
رد مع اقتباس