دارميات اضحك جذب!!
حسين الساعدي
أضحك جذب لناس وبكلبي بلوه
والدمعه وسط العين لازمها كوه!
اضحك جذب ياناس خوفي االشماته
خافنهم ايكولون رخصت غلاته!!
أضحك جذب لناس واكبالي شفتك
هذا المصور كال طَلع ضحكتك!
أضجك جذب لناس خاطر يكولون
محبوبه جان اوياه ومابجه العيون
أضحك جذب وبصوت وبكل مسيه
لا تنسمع ونات كلبي القويه!
اضحك جذب لناس وارسل تهاني
خافنهم ايكولون راح ونساني!-
أضحك جذب لناس خاين زماني
خله الدموع اتفيض وانه ابمكاني
اضحك جذب لناس غصبن عليه
صحباني والشمات كعدوا سويه
أذاني هجرك حيل شوف المصايب
أبجي بجي الزعطوط ماجني شايب!-
زين انته بالعشرين ما تعرف ابهاي
بكماطي باأول يوم والدمعه وياي!!
اضحك جذب والناس تضحك علينه
كالولي ولفك راح مامنه جيه!
وجهي ابوجه شمات وانطي الوجه وين؟
يا دمعة البلعين بالج تطيحين
اضحك جذب والعين هدت عليه
وتحشم الدمعات فزعن سويه!
اضحك جذب والروح ما مستريحه!
والدمعه ياهالناس كلش وكيحه!
أضحك جذب لناس هذا انه حالي
خافنهم ايعرفوون فاركني غالي!
اضحك جذب والناس كالوا خطيه
عاين سبب فركاك شمسوي بيه!
حسين االساعدي
رد مع اقتباس