دارميات الجروح!!
حسين الساعدي
ياهو اليجي ابهل يوم يتباره وياي؟
وكلمن يهد اجروح نتسابق ابهاي!
هد وانه اهد ونشوف ياهو اكثر اجروح
واليخسر ابهل حال ماياخذ الروح
تتراهن انته اوياي؟عمرك خساره
هاي الجروح اهواي رهن الاشاره
اتراهن انه اوياك واتشارط ابهاي
لازم تضحي الروح لو تخسر اوياي!
وينه اليراهن وين وبهاي الابيات
حضرت كومه اجروح كلهن وكيحات
تقبل رهان اوياي واقبل رهانك
واصغر جرح بالروح يخسف مكانك!
لا والله متكدرون واخذو النصيحه
جبتلكم انه اجروح كلش وكيحه
هالساحه للمجروح ردناه يجينه
والمايعرف النوح لا يعتنينه
نتباره عندي اجروح هاي الحقيقه
تاكل اجروحك راح باول دقيقه
خلينه بالمجروح هسه انتباره
ونضحي هاي الروح لاجل السهاره
دمعاتي منصبات مثل التماسيح
واجروحي يوم العيد ركبن مراجيح
وجروحي كلها اشيوخ ماكضهن الخيط
ما كعدن ابفد يوم ويه الزعاطيط!!
وينه اليجي وياي ويهدهن ابساع
خلي الجروح اليوم تلعب عله الكاع
متحلفات اليوم هدن عليه--
وجروحي ياهالناس هجمن سويه
جرحك ولا ينشاف ضاع ابصفاته
ياجرحي بين الناس يمشي ابراهاته
واتكشخت هاليوم بجروحي كلهن
مافشلني ابيوم واشكد احبهن
جرحك يهون اهواي جرحي العجيبه
مايغفه وكت الليل الا ابمصيبه!!!
منك يجرحي اهواي صحت الحسافه
صاحت عليه الناس كرخ ورصافه!
شفت الجروح البيك كلش بسيطه
واجروحي وسط الروح سون خريطه!
اجروحي خوش اجروح عاين هذني
وبمبارز المجروح ما فشلني
جرح الجنوبي اتشوف شايل علامه
وكت الزعل ياناس ينزف شهامه
وينه اليجي وياي يتراهن اليوم
لازم نهد اجروح ما شافت النوم
والساعدي ابهل يوم عنده انتفاضه
بس بالجروح انريد نطلع عراضه
اتكشخ ابكل عيد بجروحي لناس
واصغر جرح وياي من جدمي لراس؟
اجروحك انته اتهون عاين عليه
اصغر جرح وياي جنه المنيه
وينه اليكول اوياك ونهد الجروح
نركص ركص مذبوح ونضحي بالروح؟
ضل الجرح مفتوح والله اليديمه
والشده مال الخيط صارت قديمه
جربت اداوي اجروح بثنين اديه
يتنادسن بسكوت ضحكن عليه!
لا تسئل الدكتور واخذ النصيحه
شوف الجرح شيكول لمن تصيحه!
كل الهلا ابملكاك يل جبت الجروح
روحي البقت وياك ماتقبل اتروح
جرحك فقير اهواي يمشي ابكلامك
انه الاصيحه ايكول روح الغرامك!
جرحي الفلا طخ راس يم الشماته
شاف الجروح وكام يمشي ابراهاته
حسين الساعدي
رد مع اقتباس
حلوووووو
المشاركة الأصلية كتبت بواسطة .Diyaa Nawar
