باكو...
رمشي وعيوني وبواجيها
باكو...
حتى شيب امي وتراجيها
و اليصلون من جونه
ما خلصونه باكونه
نخاف من النسيم الهاب خلونه
على حبال الوكت قمصان شرونه
يربي شلون؟؟؟
خايف ع العراق يموت تاليها
خايف ع الشباب الموت يكضيها
خايف ع الاطفال الدمع يشريها
ولا غبش بعد بلعيد للميتين
اذا هي الكبور بكلبي بانيها
........باكونه.........
وسكتنه نخاف من الموت
تعبنه من الكبور ومن طواريها
وخطفو حلم طفله بكد ابوها تصير
اذا تضحك تشوف الله بمعانيها
يبنون الجوامع من خبز الايتام
وصفوف المدارس رحله ما بيها
ويصلون بقصر والقبله دم شبان
وذيج بيوت طاحت فوك اهاليها
صريفه بلا سكف والمطر جف فلاح
يحصد ب الاطفال وذره يطش بيها
والشبان شردو ختلو وي الغيم
و رجعها المطر خايف يلفيها
ابجي على الوطن لو ابجي دفنة شاب
حتى دموعي حاير وين اخليها
ام حركت نفسها ادفي ابنها النام
وكعد ما رضت واحد يطفيها
يالتعرف الله كله الناس ماتت جوع
و لو انت صلاتك نيه ما بيها
سلبوني وطن وانطوني عش محروك
وبقت بس الخريطه و وين اوديها
ع الساتر شباب انزفت بلا روس
ضلت بس كلايد والعلم بيها
و وادم ذيج ما تخجل ....
كلايدها طفل مدفون
خلونه شعب مسجون
صافن والعراق ضنون
خايف والليالي عيون
جنايز والطريق امتون
باكو حتى اليجدون
عافونه وطن ما بي كبر للمات
ومن الصبح طلعو راحو يحجون
وصلو و الكصص طمغ الذهب بيها
ناس بلا دمع رغم العيون ابار
وناس ع النفط تفتر صوانيها
وناس بلا سكف والشرف كمره بلليل
حتى الما يشوف بعينه صدليها
وناس بلا خبز والجوع مثل الريح
يبلع ب الاطفال وما يغص بيها
وطفله بلا شريط يجرها ملك الموت
ياخذ رأس ابوها ودمع ينطيها
ناس انكلها سكتو وسترو ع الاطفال
وناس نخاف ما نكدر نحاجيها
وناس عل الذهب ياخذها حجل الموت
وناس ع النجف تاخذها رجليها
..........
#ادهم_عادل
رد مع اقتباس
حلووو
