درر العراق

علي الشمري · 8/January/2016

انه رغيف الخبز منولد وسط النار
واطلع بلكي چف الجايـع اتثلمه
اصـير بـچف الاخرس چم اشارة ايد
لان بـلـسانـه تـصعـب ما صرت چلمـه
اظل واگف شمس وزماطي وي الليل
اليجي بسد غيرة خل لا ينحسب زلمـه
ما جاحـد فـظل للصنع منـي انسان
مـثل حـبل انظـفر بچـفوف اليعدمـه
انحنيت بكل كياني لموقف الطبشور
گضـه بطـرگ الچـفن لحساب اليعلمـه
الـطير المايصيده زنادي اعوفه يطير
عصامي وما احب الغـير الي يلـزمـه
ولاطبعي غصن للوردة چتفي يشيل
ومـا عـزلـتلي مره من الخَـلگ شمـه
ما غرني الشكل عرج السواحل خير
بـس شـوف الـيجيبه وبـاوع لجسمـه
اقره وجوه ربعـي وچفي ما اقراه
واعـي وخـط حياتي بزغري مفتهمـه
گـاعد للحـرامي بواهـس الـناطور
نـام گـبالي حـد مـا فسرت حـلـمـه
مو موقف ثلج بس موسم وي الناس
شـتـه وصـيف ومكاني بـهامة القمـه
اطـرح واجمع وٱوصـل للإسـتـنتاج
مـا اذب الـمـواقـف كلها عالقسمـه
المتوكل على الله ومـاحظه بتوفيق
اذا ركـزت تـلگـه المشكلـه بعزمـه
خذت وجه الجرف ما غيره شگد روج
مـكان العِشره يفرش لو چهب بَلمـه
يتـبـاها الـطريج بـطـوله گام وياي
واجـي اتبـختر عـليـه بزيادة الهمـه
ثابت بالخطى .لا جـدمي اكـثر چـان
بحـيـث الأثـر شفت الـتاج ظل يمـه
المارادوني خسروا بس گلت للـجير
شفـت وجـوه عدهم تچسح النعمـه
فـاتـح للـوداع بـگـلبي سـت بيبـان
للينساني اطـلعة وانـي بالـخـدمـه
الشهرالمالي خبزه بطوله مات هلال
حسبلي أيـامه بذني وبالي مو يمـه
العود الوجهَ أصفر وحدة واگف چان
القـوه الـعده اخذها بصاية الحزمـه
الـهيبه البلأسد من فعله عاشت بيه
ما راح اعله باب الـغابه دگ اسمـه
الكاسرخظرماتي ومالي دربي عيون
الله الـيـستر شـگـد طـيحتي تهمـه

لصديقي الشاعر
هاني زبار