(عرگة نِفس)

تعريف مفهوم التِتنّ
نفّسَين والثالث تِحن

وتكابر وتِخنك نِفس
والثاني يرجع ممتحن

اتكله ها ... شو محترك ؟
دخانك السابع جِفن

ويجاوبك ...
كلبي احترك ...
چن ميت ..ومامندفن !

متعلعل وشابع قهر
ويعاين بطارف نظر
حَضرولة وردة اعلة الچفن

وچن باقي وحدي بغربتي
لا صحبتي ولا كُربتي
ولا ولفي لايمي حِظن

وبسكته شَيعوني وشِفت
كل الاحبهم مالفو
والما احبهم عزبو
إكرامْ للميت ( دَفن )

وخطار صرت اعله الكبر
واهل المكابر تنتظر
بس چلمة يمعود ...أمر

كتلهم انه وريتي
بيناتنا… (وعركة نفس)

مرات اخنكة واحترك
وبحسبة يخنكني و أون

مرتضى الشيخ