قصيدة دمع الورود للشاعر مسلم الخشان
.................................................. ...
.................................................. ...
ما بقى في العين دمعٌ .. گمت احط بعيوني ماي
خاف اگولن دمعي خلّص والگه تابوت بگفاي
وخاف اسولف .. شارد اسولف؟
وانا ذاك الطاح سبحه بأيد واحد توه تايب
وانا ذاك العمري صفنه وشابهت باوصافي شايب
وانا ظهري الصار ثامن للعجايب
والله صعبه ...
من تحب انسان حطّك بره گلبه
والصعب عينك تسألك .. ها بچيت؟
اي بچيت .. ومن بچيت عيوني ما بيّن دمعها
"دمعة الورده بعطرها"
من يشم ريحتها ظالم
يعتني بمنجل حقد خاطر يگصها
شارد اسولف ..
انا عطشان لسوالف بيها چف النار رافگله بحر
هيبة الصحراء توگع من يمر طاري المطر
شگد هضيمه ...
من تحب انسان صدفه وينحسب حبك جريمه
انا مدفون بجرح زفة اليتيمه
مو نبي ونزلت علي ايه عظيمه
ليش اليه الليل يلبس من جراحاتي القديمه
"كشخة الصحراء خيمه"
يغار من عدها الخضار
قصة الشجره ويه چف الفاس ثار
دمعي وشل .. والحزن باني مدينه
طشر همومه بضحكتي
سوه طوفان بصفنتي
منين اجيبن نوح يبنيلي سفينه
الليل دوله تخاف من طاري الشمس
بيها لون النجمه دين
ماكو بيها انسان يفتي وماكو ناس معممين
تلگه بيها گلوب ترفه .. عدهم الورده إمام
كل سوالفهم غرام
والجرح بعيونهم اكبر حرام
شارد اسولف .. هذا حالي
چني نجمه ودارت اعليها الليالي
وچني كافر فكرة التوبه اعله بالي
ردت اتوب وما تبت والسبب ملك الموت اجالي
رد مع اقتباس
