هنا

[.Diyaa Nawar]

خلاني الوكت مابين هذا وذاك ...
وابد ماريد تندم لو زمن وازاك ...
صحيح الزمن اغبر بالحزن خلاك ...
ماريدك سهل والعالم اتصيبه
======================

[.Diyaa Nawar]

يمته ارتاح ؟؟؟؟؟ واشوف الكلب بارد والليالي افراح ...
يمته ارتاح ؟؟؟؟؟ وانتم والزمن شايل عليه اسلاح ...
يمته ارتاح ؟؟؟؟؟ مو روحي انتهت والعمر عده وراح ...
يمته ارتاح ؟؟؟؟؟ واكعد منسعد يم شجرة التفاح ...
يمته ارتاح ؟؟؟؟؟ اذا اني سفينه وضيعت ملاح ...
يمته ارتاح ؟؟؟؟؟ واطلع من ظلامي واشعل المصباح ...
يمته ارتاح ؟؟؟؟؟ واني الحزن بيه وابد ماينزاح ...
يمته ارتاح ؟؟؟؟؟ واكولن من صدك عايش فرح مرتاح ...
يمته ارتاح ؟؟؟؟؟ والدنيا عليه صارت الذباح ...
يمته ارتاح ؟؟؟؟؟ واخلص من عذابي والألم ينزاح ...
يمته ارتاح ؟؟؟؟؟ واكتب بس غزل ما اكتب انه اجراح ...
===============================

[.Diyaa Nawar]

حزن وهموم عايش والزمن دوار ...
وروتين الحياة اشلون اوصفنه ...
كل هذا واسولف وابتسم للناس ...
مايدرون حنظل جاي اجرعنه ...
مكتوب الحزن بس للعراقيين ...
ما اعرف عليش اويانه يتعنه ...
ماشفنه السعاده وراحة البال ...
كظينه العمر ياناس نتمنه ...
نفرح ياوكت ونعيش مثل الناس ...
ونعوف الحزن وانكول اودعنه ...
عجايب دنيا سبعه وكلكم اتعرفون ...
واذا شفنه الفرح ثامن ارقمنه ...
===================

[.Diyaa Nawar]

مثل دجله وفرات اعيوني صبن ماي ...
لأن حنيت الك واشلون اسكتهن ...
رحت مني يوالد وانه عمري ازغير ...
وصور عندي الك مايوم افاركهن ...
تعال وشوف كلبي اشلون عايش نار ...
وجروح الزمان اشلون اضمدهن ...
اذا اذكر خيالك روحي كلهه اتذوب ...
وملامح صورتك بعيوني اطرزهن ...
شسولفلك شكولن وانته ابعيد ...
وهموم الليالي اعناد اجاملهن ...
مثل طيبة حنانك ماشفت بالكون ...
وكلماتك ابالي ودوم اذكرهن ...
اذكرك بالقصيده واكتب الكلمات ...
حالف بالقصيده اعصاب ادمرهن ...
ياشمعة حياتي ابد ماانساك ...
رغم احزان بيه وجاي اقشمرهن ...
اسنين العمر يابويه معدودات ...
مااعرف يساعه اليوم اودعهن ...
بس لازم اجيلك واندفن وياك ...
وكبور النجف وياك اجاورهن ...
====================

[.Diyaa Nawar]

وصل بيك ألقطار ألأخر ألمشوار ...
وضميرك صاح نازل وأنته نزلته ...
عفت حبي وحناني وعشرة ألأيام ....
ماهزك ضميرك گلبي من خنته ؟.....
صرت حيل أنزعج لو مر علي طرواك ...
ودفتر ذكرياتك بيدي شگگته ....
عفتني باألألم وجروحي مفضوحات ....
ومواويل ألحزن لجروحي سمعته ....
ياوسفه وندامه وفوگهن ياحيف ....
من طاح ألحمل وياي ماشلته ....
تره ألدنيا مواقف بين هاي ألناس ....
وأصحاب المواقف كلهه ذاكرته ....
من طبع ألجرح يتعالج أيطيب ....
بس ألأثر يبقه أشما عبر وكته ....
دنيا وبيهه أعيش أشلون ماكان ....
لأن كل ألبشر للموت أخرته ....
ما أهتم بعد لو ردت عني أتروح ....
أسمك من خيالي ومن عقل شلته ....
=====================

[.Diyaa Nawar]

من زغري يواسط أني عايش بيچ ...
يعني أترعرعت من زغري بحضانچ ...
يا أجمل أولايه بنظر هاي ألعين ...
ياورده وعطور أيشيل بستانچ ...
عشت بيچ ألطفوله وأجمل الأيام ...
ياقمه وحضاره وربي يبرالچ ...
غزانه ألشيب هسه وصرنه أحنه أكبار ...
لذالك بالقصيده أذكر أيامچ ...
مثل سرب ألنوارس أنتي عالبال ...
ويوميه أبمنامي أتزورني أحلامچ ...
ياروعه وترافه وحسنچ أمحليچ ...
ومن خيط ألشمس صاغولچ أسوارچ ...
ياسدة ألكوت وملتقى الأحباب ...
يحله ألشعر بيچ ودوم نقرالچ ...
أشكثر أيام عشنه وما أظن أتعود ...
بس لازم أذكرچ وأذكر أحوالچ ...
وحگ ربي قليله أبحقچ ألكلمات ...
يا أجمل أولايه وعمري يفدالچ ...
====================

[.Diyaa Nawar]

لاتفرح يشامت بينه وتلوم ...
ولك دنياك خايب والله غداره ...
يجيلك يوم تبجي وبالحزن مهموم ...
لأن هذا الزمن ماتعرف اسراره .....
اذا شمتان بيه ومبتسم فرحان ........
لاتنسه ابد دنياك دواره ...............
اقسملك قسم ماتبقه هيج ادوم .........
يل كلبك عليه صاير احجاره .........
بس اني اعذرك عقلك ازغيرون .....
ماتوصل العقلي وتوصل افكاره ......
========================

[.Diyaa Nawar]

من تلغي الصداقه بين الاسباب ...
خاطر نفتهم وانكول اعذرنك .....
روح ابراحتك صدكني مازعلان ...
ياورد الحدايق من اشمنك ...........
ماعندي بغض وي كل بشر مخلوق ...
لذالك بالشعر حبيت اسمعنك ...........
كلمات العتب مرات مره اتكون .......
ما اعتب عليك ايجوز اظلمنك .........
من طبع البشر بالدنيا حر ايعيش ......
واذا ناوي البعد مايوم اجبرنك .........
=======================

[.Diyaa Nawar]

مفتاح الفرج عن الصبر يحجون ...
يامفتاح هذا وصبري خلصته ......
صبرت اسنين اني وكلت هسه اتهون ...
وخلص عمري وطريق الفرج ماشفته ...
شصبرلك بعد من اجل انته اتعود ........
وتعوف الزعل وتكول سامحته ...........
تعال ارجع اليه وننسه كل الفات .........
لان كلبي ابغيابك حيل عذبته .............
غلطان اعترفلك من جدم للراس .........
بس الراح ..راح وينتهي ابوكته .........
احبنك واريدك وافرح ابملكاك ...........
لان كلبي ابمحبتك انته علقته ............
ياساكن ابالي وشاغل التفكير ............
تعال الحك عليه العمر وشلته ...........
نبقه الياوكت هيج احنه مفترقين ........
ودليلي ابسيف هجرك والله وذرته .....
جاوبني ابصراحه ورد عليه ارجوك ...
ماريدك بعيد ولازم السكته ..............
ماتسوه الحياة انعيش مبتعدين ...........
ولك هذا البشر للموت اخرته ...........
=====================

[.Diyaa Nawar]

قبل جانت الوادم ساعه تسعه اتنام ...
هسه الفيس اجانه وغير الحاله .......
وقبل جانوا اهلنه لمن ايدرسون .....
ماعدهم ضوه ومكابل اللاله .........
خلانه التطور دوم سهرانين .........
حته النظر راح وظلت اوشاله .......
بس هيه المصيبه الناس وين اتروح ....
اذا لوعه وحزن وهموم تبراله ..........
من اجل المزح من اكتب الكلمات ......
ماريدن صديق ايخلي في باله ...........
========================