هنا

[.Diyaa Nawar]

معبره ابعيد ونفخ صدره السبع
صاح واشرگ مبسمه وذب الدرع
اتحنطو چنهم تماثيل الشمع
ومن وصل للماي راهي ابختره
========================

[.Diyaa Nawar]

بختره ومغضب وحمگان وعبوس
يشمر الفارس على الخيل التدوس
مثل عزراييل يخطف بالنفوس
هيه بس لحظه وتصير الاخره
========================

[.Diyaa Nawar]

الاخره اتكوم ويفر بيها ويطوف
غازله الموت وبرم طرف الزلوف
سيفه عصة موسى تبلع للسيوف
ورمحه الاستاذ وعليهم مسطره
=========================

[.Diyaa Nawar]

مسطره ومن والده الهزبر ورث
مايرد الا الجثث فوك الجثث
هذا حال البايع ورد ونكث
الا تبگه ارگابهم متكسره
======================

[.Diyaa Nawar]

مكسره تظل ويسم بيها العناد
والطراد يلوگ بس لهل الطراد
لا چن الحر والعطش يرخي الشداد
وبالغدر سبع الكناطر مادره
======================

[.Diyaa Nawar]

مادره وذب لامته وللموح فات
صفّه خابطها وخبط صافي الحياة
يبس ريج الماي بشفاف الفرات
وناره من حر العطش متوجره
=========================

[.Diyaa Nawar]

اموجره وبچفوفه جس ذاك البرد
يغرف الماي ويشت عنه ويصد
راد يشرب بس ذكر ظل چم چبد
يلهب ابحر العطش يتنطره
==========================

[.Diyaa Nawar]

ينطر ابحسره ويهيدها الونين
ذبه من چفه وصفگ چفه الامين
هوني يانفسي بعد نفس الحسين
اشلون اشرب گبل ابن طه وبره
======================

[.Diyaa Nawar]

گام زم الجربه والماي انترس
ضهضب امعّبس وهنجل عالفرس
مثل حوت الشايط وطر الحرس
واحتده اعله الگوم مثل القسوره
========================

[.Diyaa Nawar]

قسوره ولمهم ابليس وليه لفوا
بين يمنه ويسره وجناح التگوا
بعد ما خنزر وصاح اترادموا
راس طك راس وسره يطك ابسره
========================