وحگ أللي حمل رايه ........ وحملهه
عفى گلبي أشكثر ذله ........... حملهه
علي بأسمك توضع ألحامل ... حملهه
علي وينك أتشيل الحمل ليه
=====================
جرحك ياگلب يزداد ......... ويزيد
وعليك ألشمر شح الماي ... ويزيد
أشما طال ألعمر ياناس .... ويزيد
لازم بالنجف تبقه ألهويه
=====================
زماني بالحرب ضدي ... ولك شان
فقير وجاكي صايرلي ... ولك شان
لبن وياك ما أذكر ........ ولك شان
عجيبه أشلون ماتسأل عليه
=====================
أذكر أيام ألطفوله وأذكر أسنين ألحياة ...
وأذكر ألبيت ألقديم ألچان يجمع كل فئات ...
عشت أحلى أسنين عمري ...
وهسه صارت ذكريات ...
=======================
مسجون وعليه طالت الأيام ...
يارب ألعباد أشلون أگظيهه ...
طبيت ألسجن بس أنه مظلوم ...
وألشكوى مذله ألغيرك أشكيهه ...
أحس روحي أنتهت وألصبر فاض أوياي ...
ودموع ألعين وكت ألليل أبچيهه ...
عشت عمري وحياتي مثل طير أيطير ...
وخلاني ألزمن بالقفص تاليهه ...
عذرا يازمن مو منك أنته ألصوچ ...
صوچ ألبشر طاغي أبكل معانيهه ...
لأن عنده ألظلم يعتبره رفعة راس ...
بس حوبة فقير أوياه أخليهه ...
بعض مرات أگولن أنتحر فد يوم ...
بس أرجع وأشيل ألفكره وأمحيهه ...
لأن أمي ألعزيزه أهواي شافت ظيم ...
وأگولن لو متت ياهو اليداريهه ...
چنت أني ألوحيد ألأشتغل بالبيت ...
وأذا طاحت مريضه بأيدي أباريهه ...
لأن خوان عندي بالأسم خوان ...
ولا واحد أجاهه وگال أمر بيهه ...
أسولف من ألم وأعصابي مشدودات ...
وأكتب شعر خاطر روحي أسليهه ...
وينك ياعلي ياحاضر ألشدات ...
أريد ألشده منك كون تگظيهه ...
======================
عزيزه ألوالده وتعبت علينه أهواي ...
وأذا أنطي ألعمر مايوم أجازيهه ...
سهرانه ألليالي وأحنه مرتاحين ...
يارب ألعباد ألصحه تنطيهه ...
أمي ألتاج تبقه ودوم فوگ ألراس ...
وجميع ألناس تشهد ينحلف بيهه ...
چنه أزغار أحنه وحيل شبعت ظيم ...
ونكبات ألزمان أهواي تاذيهه ...
حنان وطيبه عدهه أيفوق كل الكون ...
يا كلمات أكتب حته أوافيهه ...
تحت أقدام أمي ألجنه كلهه أتكون ...
يعني الجنه أمي من أسميهه ...
يا أرض ألنجف أعتب عليچ أهواي ...
ليش ألجنه جوه ألگاع تخفيهه ...
مايبقه ألبشر بالدنيا عايش دوم ...
بس عندي رجاء أبرقه داريهه ...
لأن ضغطت قبر بيهه الألم يزداد ...
وأحسن روحي تنظك من أحاچيهه ...
رجائي للأله ألواحد ألقهار ...
ماريدن جهنم تسأل أعليهه ...
=====================
حاربني زماني وألدهر غدار ...
ونحسات ألليالي أبحزن خلني ...
مجروح وأبد مايهده جرحي أوياك ...
وحسراتي أخاف أبيوم يعمني ...
دكتوري ولك من شاف جرحي أحتار ...
مأيس گام عني وأبتعد مني ...
راضي بالحزن والقهر وأهموم ...
ولا فد يوم راسي أگبالك أيحني ...
أسمع بالفرح ماشفته شوف ألعين ...
لا يوم الأجاني ولا سأل عني ...
======================
طول ألعمر عايش بين ... صحبان
وعلينه ألكبر ياهلناس ... صحبان
مو هينه أبد لو عفت .... صحبان
حبهم أبگلبي أسنين وأقسم يعالم ...... قسم
وأبعث سلامي لجل كل فرد داخل ... قسم
سنة حياة أنعيش والزمن يقسم ........ قسم
بس أحنه مانفترگ رغم ألزمن ... صحبان
========================
عليك ألروح تسأل بس ألك تشتاگ ...
ما تعذر أبد لو أنته مو يمهه ...
عاملهه أبلطف يمعود أترجاك ...
ليش أنته أبجفاك أتريد تخذلهه ...
====================
ما أنساك حته أبشهگة ألموت ...
وأبد ما يوم لحظه أتغيب عن عيني ...
ذمه ابرگبتك لو شالوا ألتابوت ...
لاتنسه ألمحبه ألبينك وبيني ...
====================
نسر خلك أتخوف لاتحط عالگاع ...
ولاتعكف جنح لو شدت الريح ...
لاگي الريح ملگه وبيك مابيك ...
تره الشمات أرانب بالك أطيح ...
====================
أريد أعيوني تغمض حته أنام أرتاح ...
لكن للصبح ماغمضن أعيوني ...
مشغول الفكر ويسولف أبطاريك ...
ولأن مو أنته يمي زادن أجنوني ...
چنت عايش حياتي ودوم خالي ألبال ...
ومن يوم ألعفتني ذبلن أچفوني ...
ليش أتخلي حبنه أبكل سهوله أيضيع ...
تعال أرجع أليه وغالط أظنوني ...
حبيبك وين گالوا ؟؟؟ گلت هسه أيعود ...
وأجر حسرات أظلن من يسألوني ...
مايدرون گلبي أشگد ألك مشتاگ ...
وجروحي أبغيابك حيل أذوني ...
بس أنته الوحيد ألتفتهم معناي ...
وجميع ألناس كلهم مايفهموني ...
=====================
رد مع اقتباس