راح وكتي!! وبعد مايحچون #بيه
راح وكتي!!
وبعد مايحچون #بيه
شگد غشيم؟
وأمّنت بأفكار #حيه!
آخ ياوكتي الگضيته
بعين تبچي وعين تضحك
ويه وادم موش #هيه
شيخ روحي!
وعزبت بأسنيني كلهه
وگلبي صينيت الرمّيض
رغم مامش
ترس #اديه
خلگي چان اطوّل مضيف!
وفارشه الهم
إبشر وميهم و صار وهاي #هيه
تارس عيوني
هله وضحكه عريضه
تگول چني #الناصريه
واليجيني!
اذبحله اكبر عوز عدنه
وأخبص البيت او اصيحن
ياهله بالجاي #ليه
وامي فشله تصيح يبني
بالك إتقّصر يبيتي
وخلي روحك
دوم للصاحب #فضيه
يمه..يمه..
يمه اگلّچ هذا اخوي
شلون اخو مايبتشر لو شاف #اخيه؟؟!
وامي تضحك..عفيه يبني
عفيه ياشعرة گليبي
وصير مثل امك #سخيه
الدار المايدش خطار بي
چن دار #أميه..
يمه عود إنشد صديجك؟؟
يمه اضن محتاج شي خايب #خطيه
هيچي وكتي المنهدر
خلصته وي وادم ثمن للطيب #ديه
يااااااارخصني!!!
وفرهدني چفوفهم چن #واهليه
ومن تِرَهوّ
احنه ولد اليوم صاحوا
عيني عينك ماشفتهم!!
إو لا گبل جياتهم ترگع #عليه!!
كون باب الحوش يحچي
چا لعن كل گعده يمه
وغبگ عتبة گِصّتَه..وسواله #صَيّه
========================
رد مع اقتباس
المشاركة الأصلية كتبت بواسطة الحالمة
وأنتي ألعايشه أخيتي شكراً جزيلاً
