اول كتاب بحياتي كان هدية من ابوية قصة (الدجاجة المغرورة ) لهسة اتذكر من اخذني للاسواق المركزية من جان الدرج الكهربائي بعده يشتغل بيهن وعامرة بالبضايع ..وخلاني اختار القصة بنفسي مع انه جنت بعدني ما مسجل بالمدرسة بس اشتريتها علمود الصور واشتريت وياها لعبة ميكانو .....ومن وكتها احب الكتب ولان ابوية عندة مكتبة كبيرة ومنوعة ورثها من جدي .... أني كبرت بالعمر و الكتب كدام عيني وصار احلى شي بحياتي الكتب ومن تقرا وتعيش بعالم ثاني وبزمن ثاني وتعيش عالم الافكار
اول كفخة اكلتها من ابوية جانت بكتاب المنجد في اللغة جان لازمة ويقرا وما اتذكر شنو سويت من مصيبة طبكَة وسمطني بي على ظهري وجان الكتاب هذا مثل الاستراحة عندي كل ما اضوج افتحة اكلب صور الحيوانات والناس والادوات واسمائها
ومن صرت بالثاني ابتدائي كل ما اطلع ويا ابوية للشارع كان يخليني اقرا شكو لافتة تجارية مال محل ....
بالثالث ابتدائي خلاني اقرا الجرايد بابل والثورة والجمهورية ومجلة الف باء و مجلتي والمزمار وسمير ...طبعا جنت احلى شي عندي عزيزي عزوز وقسم التسلية والكاريكتير بالمجلات بوكتها
اول كتب قريتهن بصف الخامس الابتدائي كتب علي الوردي اول واحد بديت بي (لمحات اجتماعية من تاريخ العراق اول 3 اجزاء ) عجبتني القصص بوقتها وراها قريت كل المجموعة بالعطلة الصيفية ما عدا وعاظ السلاطين ما كان موجود بالكتب واشتريتة بعد سقوط بغداد
اول رواية قريتها جانت الاشجار واغتيال مرزوق لعبد الرحمن منيف وثاني وحدة كانت سنة اولى حب لمصطفى امين لكيتها مشكوك الغلاف مالتها ومشمورة فوك المكتبة رغم انها كانت طويلة جدا خلصتها باسبوع بعطلة السادس الابتدائي مال نص السنة ...
بالاول متوسط اختلف الوضع شوية حسيت المعلومات تضيع مني ...جبت دفتر وبديت الخص الكتب والمعلومات اللي اقراهن ( طبعا هذا الدفتر تحول الى سجل من الحجم الكبير وحاليا استبدلته بملفات وورد على الحاسبة عددها حاليا بالعشرات لكل كتاب ملف وورد )))
.... قريت كتب سلامة موسى عقلي وعقلك واحلام الفلاسفة ..هم بالعطلة ...لان بالمدرسة جنت مكضيها مجلات جرايد او افلام اجنبية ماكو وكت للكتب
ب العطلة مال الثاني متوسط اتجهت اكثر للكتب الدينية قريت الكتاب المقدس 3 مرات الاولى سريعة والثانية بتفحص والثالثة مقارنة بين القصص الي بي وبين القران ...
لحد الثالث متوسط وامتحانات البكلوريا التهيت بالمدرسة والحمد لله معدلي طلع 92 وراها تقريبا تغير الوضع والتهيت بالشغل وعفت القراية فترة طويلة بس مجلات وجرايد
ورا 2003 والاحداث اللي صارت وراها وكعت بغلطة اني صارت ردة فعل عندي من الدين بسبب اعمال المسلمين وحوادث فردية شفتها بنفسي ..وهذا غلط اتمنى ما اكررة مرة ثانية ((اللي هو قياس الافكار على معتنقيها وتطبيقهم الها ))
المهم بال2005 لكيت كتاب مشمور بالسلة مال الزبالة ومشكوك نصين مع انه بي ايات قرانية هواي ..لان الافكار اللي بي ما عجبت صديقي بالشغل اللي قرا قبلي اخذتة ولزكتة وقريتة اسمة كتاب ساعة قضيتها مع الارواح لمحمد علي حسن الحلي ..بالبداية سوالي صدمة وردة فعل سلبية بس صفنت شفت الحجي مضبوط واني ردة فعلي عاطفية ....وخلاني استرجع حماسي للقراءة من جديد وشعل في بالي اسئلة هواية محتاجة اجوبة حول الكتاب
دورت وسالت لكيت صاحب الكتاب اللي انطاه لصديقي ..... وطبعا صاحب الكتاب اعرفه معرفة سطحية بالشغل بالشكل والاسم بس واكرهة مع اني بحياتي ما حاجي ويا قبل لان الناس تحجي عليه انه (( يسفه احلامنا ويذم الهتنا ..والاسطوانة المشروخة نفسها بكل زمان ومكان على كل مخالف بالافكار ))
طبعا ترددت هواي قبل لا اسأله عن الكتاب بس كلت خلي افتهم منة وبعدين ارجع اكرهة
ولكيت عندة مجموعة كاملة للمفسر محمد علي حسن الحلي خمسة كتب وبديت بيهن بالتسلسل (الكون والقرآن ) ( الانسان بعد الموت) ( تفسير المتشابه من القران ) (الخلاف بين التوراة والقران ) وخلصتهن كلهن باسبوع وبصفي ورقة وقلم وحضرت الاسئلة والملاحظات عليهن وتناقشت ويا ناس حولهن لمدة شهرين او 3 وكل فترة بهاي الشهرين ارجع اقراهن مرة ثانية و3 لان اكو تفاصيل هواي بيهن بالنقاش طلعت ما منتبه عليهن ومفتهمهن غلط .... وصار هذا الشخص من احب الناس وحاليا هو جد اطفالي الشخص اللي ما جنت اطيق اسلم عليه بالشغل بدون سبب لمجرد راي سمعته من غيري وهمة سمعوه من غيرهم ..صار اقرب الناس الي وتربطنا علاقة مصاهرة ونسب وطلع كلام الناس عليه كله تسفيط وردة فعل عاطفية لا اكثر ولا اقل (( ونفس نوعية اللي جانو يحجوا عليه كامو يحجو عليه بنفس الاسطوانة هههههههه))
المهم هاي المجموعة من الكتب خلتني افتح عيوني على اسلام ثاني وصورة جديدة للنصوص القرانية صورة تتفاعل ويا الانسان ويا الزمن الحاضر والمستقبل وخلتني اشوف الاسلام دين وعقيدة اكبر من السنة والشيعة واسماء شخصيات تاريخية وحوادث صارت قبل 1400 سنة ...وفهمتني انه الاسلام دين واسلوب حياة والقران مو كتاب تقرا بالفواتح وتحطة بالسيارة مثل طوطم او ايقونة للحماية ..وانما نص تتفاعل ويا بالحياة وتعيشة بحياتك اليومية وماكو شي ابيض واسود وانما اكو مساحة بينهن تحتاج تنتبه لوجودها .....
وراها رجع شغفي للقراءة وبديت بكتب احمد ديدات قريتهن كلهن وروجية جارودي وموريس بوكاي وكم كتاب لناس كتبت ضد الاسلام و ضد القران ماكو داعي اذكرهن حتى اقارن وافتهم اكثر من رأي ووجه نظر وكتب فلسفة ومنطق وشوية كتب علمية مبسطة وكلشي احاول اكدر احصلة بالوقت الحالي واقرا ....
ليش هاي الجريدة كلها ؟ وهذا الموضوع الطويل ......احب اوصللكم فكرة وتجربة اني استفاديت منها وغيرت حياتي واتمنى انه تكون تغيرت نحو الافضل ....
دائما خلي مكتبة بالبيت وعلم اطفالك على القراءة واحترام الكتاب حتى لو كتاب المدرسة وصير نموذج وقدوة الهم بهاي السالفة وشجعهم على المطالعة الخارجية وخلي عندك دفتر ملاحظات تدون بي اهم الافكار اللي قريتها والاقتباسات اللي تحب تناقشها لاحقا
..وحاول مناقشة الافكار اللي بيها ويا اطفالك بشفافية وبدون تعصب قدر الامكان ..ما تعرف شكد خير او فائدة تفوتك اذا اهملت هاي السالفة ...
ولا تقرا بس للي يوافق افكارك او معتقدك وناقش الافكار وعوفك من الاشخاص واللي تسمعة عنهم ..واسمع منهم شخصيا او من كتاب هم كتبوا بايدهم او اشرفوا عليه بحياتهم
وعيش حياتك وفق فلسفة وافكار انت مقتنع بيها بعد ان ترجح عندك صحتها ... ولا يهمك الناس لان محد راح يتحاسب يوم القيامة غيرك او بمكانك...
عيش مرتاح الضمير وباقتناع وراضي عن نفسك احسن مما تعيش منافق حتى الناس ترضى عليك
ودمتم سالمين
مواضيع ذات علاقة من هو محمد علي حسن الحلي
رد مع اقتباس
