قلبي من ينبض يا إسم يلفظ ..... حسيناه
الله خلاني يلهج إلساني ..... حسيناه
*********
إحسب ليوم أربعينك من كبل عام
و أنتظر يمتى المواكب ترفع اعلام
ملحمة و أجمل نزال تكتبه الأيام
معركة بين المسافه و بين الجدام
العنده موعد وي حبيبه يرفض إينام
لو حچه دمع إشتياقه يسكت اقلام
اركض و أمشي .. أغلى من كل شي ..... حسيناه
بالمهد آني .. يلهج إلساني ..... حسيناه
**********
تنطلق أول شرارة بدرب المصاب
يبتدي أشرف تنافس بين الحباب
و الوصل أول هديته يقبل الباب
زينب اتناديه أهلا خلف الحجاب
و الوصل لحسين يمشي يحسب إحساب
البشر من تحت جدمه تاخذ تراب
انا اتمنى .. أوصل الجنة ..... حسيناه
من تلگاني .. يلهج إلساني ..... حسيناه
***********
خطوة الكاصد حبيبه بعد الفراك
تنبي منبر للمحبه و تنضح أشواگ
جنه يوم الحشر نمشي الساك بالساك
و أني كل خطوة أنادي والله مشتاك
فركة المحبوب صعبة تنشف الرياك
ما تضل الدنيا دنيا بلايا عشاگ
من يرف قلبي .. يكتب بدربي ..... حسيناه
هذا عنواني .. يلهج إلساني ..... حسيناه
***********
من أنام إعلى التراب و أني مشاي
اشعر الفردوس ملكي بنوتي هاي
من تعاندني المسافة تتعب اعضاي
التف حولي و احس حسين وياي
ويه كل موكب أشوفه ايوزع الماي
إيكول من تشرب يزاير يرتوي إضماي
يالردت تنصر .. اشرب و إذكر ..... حسيناه
هاجت احزاني .. يلهج الساني ..... حسيناه
**********
أذن آذان المسيرة و سارت اصفوف
مسابك وملهوف يركض ويه ملهوف
الصحارى إتصير وردة تنثر إطيوف
و الظلام ايصير گمرة بدرب الطفوف
حتى لو ماتت أجدامي اوصل إزحوف
صرت اشوف الدنيا كلها أربع إحروف
طبعي عباسي .. تسبح انفاسي ..... حسيناه
ويه وجداني .. يلهج الساني ..... حسيناه
***********
للشاعر : عبد الخالق المحنه .
الرادود : باسم الكربلائي .
**********
طبعت بأنامل العبد المذنب علاء 3laa
٢٠ صفر١٤٣٧هـ .
رد مع اقتباس
المشاركة الأصلية كتبت بواسطة ♡هبة الله♡
