متعني طول السفر
فانوس ليلي طفه
وبروحي فز السهر
والصبح فجره غبش
متعنّي طول السفر
ضلّيت اعد بالنجم .. كل ما يمرني حلم
ينفخ بعيني الجمر
واشتعل كلي الك
موگد شته من الصبح
وأحرگ ضلوعي حطب
سبوره صار الوكت
واسمي عليهه انشطب
وعمري بطرف ضفّتك .. نخله اشتهت دهلتك
بس ما تحمّل رطب
خليني ساكت ترى
ما بيه حيل الحچي
ولا بيه حيل انتهظ
حته ابهواك ارتچي
بعيوني شمعة فرح .. كل ما تشب تنجرح
وتذوب من البچي
يل واعدتني ابوعد
وين الوعد وفه الي
گتلك سببنه هلك
گلت ايه .. سببنه هلي
وگتلك وكتنه محن .. بس گلبي لأجلك يحن
گلت الوكت عاذلي
وضلينه نحلم عمر
وبالليل نگعد سوه
الحد ما يطر الفجر
ويجيب حفنة ضوه
وتدريني بيك من أحس .. چنّك اگبالي شمس
لا .. چنّك انته الهوه
تتنفس ويه الصبح
واشتم ابنفسك عطر
ولمّن اجاني الخبر
حسيت گلبي انفطر
غيمة حياتي اصبحت .. صدگني لمّن رحت
مخنوگ بيهه المطر
شتريد اصبلك جرح
گاع الجفن مملحه
وي الّي كسرت الگلب
هاك الگلب صلّحه
بس خاطري الي انكسر .. ما ظن يفيده الجّبر
من تحلف مسامحه
رحت انته ويه المشو
ما ارتجي ابردّتـك
يل ميّت ابلا سبب
گاع الغرب دفنتـك
بشفافي لحفر گبر .. واترابه كومة شعر
واسمك عليه ينكتب
كل ما احنن الك
اتعنه لزيارتك
مما راق لي
رد مع اقتباس
