ابو كاطع لمن لا يعرفه هو شمران الياسري احد فطاحل الكتاب الساخرين في العراق توفي في براغ بحادث سيارة , وكان (رحمه الله) مطاردا من قبل النظام البائد بسبب شيوعيته , وهو ريفي من ابناء محافظة واسط من ناحية الدجيلة , وهنا احدى حكاياته وبطلها الدائم (خلف الدواح) .

كان خلف الدواح- ايضا"- يشاهد التلفزيون في كَهوة الميثاق- بمدينة الثورة- ويصغي الى اجابات السيد مدير مؤسسة النقل، الذي راح يعدد اسباب الازمة- أزمة النقل والمواصلات- فكان من اهمها (في نظره) (تواجد!) سيارات الفولكا والمسكوفيج في العراق، لانها (تحمى) بالصيف و(توكَف) ولابد ان السير يتعرقل وتنقطع المواصلات.. وعندما (تحمى) لابد انها توكَف وعندما توكَف يتعطل وصول الركاب وتتعرقل الامور واذا تعرقلت (الامور)...... يلتفت خلف الدواح الى الجالسين بكهوة الميثاق ويقول:- ذيج السنة ساجت العباس (سركَال الجرية) حط عينه على ابنه الزغير (احميدي)، وصار عنده اعتقاد بأن (احميدي) لكَطه.. يفتهم ازود من اخوته الكبار.. وكَام يجيبه وياه للدواوين. معلومك جانت الاصول بالريف، ما تسمح للطفل بكَعدة الديوان، لكن ياهو اله خلكَ ويتبالش وي ساجت العباس بحجي زايد وناكَص؟!يوم من الايام جابوا (غدا) لساجت، والغموس دهن ودبس..واحد من جماعتنا مقهور من الولد، راد يبهذله بالديوان، وجان ينشده:- يكَولون عنك يا (احميدي) تفتهم حيل.. ارد اسعلك سوعال : منين يطلعون الدبس؟جاوبه احميدي:-أم.. م.. !!حتى هاي ماتعرفها؟!يطلعون الدبس من (مزاليج) البصل!!وجان يكَوم ساجت العباس على حيله ويكَول:-هاي خطوة.. خطوتين لبو فاضل.. ان جان امعلمه.. يو كايلله على هالجواب.. ولكم هاي (الهام رباني)!!