ثلثينك اسمر للحنطه
من تشهك جن جفلت بطه
جملني بنهدك نص غطه
انبكلك جن فحل الوز
جريت اثيابك للصره
وشفت الدك واصل .. للبصره
كتلك نلعب كتبه وطره
فنك كتلي تعدي الحز
حز خصرك فرارة فضه
وشامه بنص خصرك معترضه
همي بفضتك شنهي الفضه
غير امكابر بوس ولز
.. تدريني
ماضكت أفراشي
من يوم اللاكيتك ماشي
وي غيري .. وطعمته برآشي
بس آني ابعشكك ع المز
ترجيتك..
سديت الباب
مغيرير وماتسوه أعتاب
حكك ياشجرة عناب
لاجن نكدرلك بلهز
وعنابك طاح اعله الفرشه
ونزلنه خديدك عن عرشه
وعلمنه عرانك ع الرز
كالولك آنه امن الطين
صدكوا .. بس طين ابساتين
طينتهم صبخه وعدلين
ودود البي ماهو قز
تذكر يامه سكرنه بريجك
ويدينه تصلي بشك زيجك
ياضيج العين شما ضيجك
جرت عينك جود وعز
بستان حفادل هليرعش
يزغير ماضاك المشمش
أسألني ياخمره اتغوش
الينجاس بكطنه يفز
بطلنه نحب .. شنهي أطلابه
لاجن نوبات أندك بابه
نكله شلونك يطوي أكتابه
كلسا دمعة عينه تنز
صوجك ضيعت ألأيام
كلما صح الليل تنام
شميتك شمة شمام
وكتلك باجر....باجر سز